Պատրաստվում է ՀՀ աշխատանքային օրենսգրքում փոփոխությունների եւ լրացումների մասին նախագիծը: Այս մասին այսօր՝ սեպտեմբերի 10-ին քննարկում էր կազմակերպել «Մեդիա» կենտրոնը: «Ներկայիս նախագիծը շուրջ հիսուն հոդված է ներառում ՝ աշխատանքային օրենսգրքում փոփոխությունների վերաբերյալ»,- ներկայացրեց աշխատանքի եւ սոցիալական հարցերի նախարարության Աշխատանքի եւ զբաղվածության վարչության պետ Թադեւոս Ավետիսյանը:
Նշենք, որ ՀՀ աշխատանքային օրենսգիրքն ընդունվել է 2004 թվականի նոյեմբերի 9-ին: 2005 թվականի հունիսի 21-ին ուժի մեջ մտնելուց հետո օրենսգրքում 17 անգամ փոփոխություն և լրացում է կատարվել:
Թադեւոս Ավետիսյանի խոսքով՝ օրենսգրքում փոփոխություններ են կատարվում երկու նպատակով. «Առաջին մասը վերաբերում է իրավակիրառական պրակտիկայում տեղ գտած որոշակի խնդիրներին: Որոշակի տարընթերցման կամ տարըմբռնման կետեր կան, որոնք ենթակա են փոփոխման, ավելի պարզեցման»,- ասաց պարոն Ավետիսյանը՝ նշելով, որ ԱՍՀ նախարարությունը մոնիթորինգներ, վերլուծություններ է իրականացնում, հավաքում տարբեր կարծիքներ, բողոքներ աշխատողներից, գործատուներից, հասարակական կազմակերպություններից, վերլուծում աշխատանքային վեճերին վերաբերող վիճակագրությունը եւ ըստ այդմ առաջարկում դրանց օրենսդրական կարգավորման հնարավորությունները:
Ըստ Թադեւոս Ավետիսյանի՝ աշխատանքային օրենսգրքի փոփոխության պատճառն այն է, որ Հայաստանի Հանրապետությունը վավերացրել է Եվրոպական Սոցիալական խարտիան, Աշխատանքի միջազգային կազմակերպության մի շարք կոնվենցիաներ եւ վավերացնելով միջազգային իրավունքի այդ փաստաթղթերը՝ ձեռք է բերել նաեւ որոշակի պարտավորություններ եւ պետք է օրենսդրական դաշտը համապատասխանեցնի միջազգային փաստաթղթերում ամրագրվածին:
Կարդացեք նաև
Խոսելով սպասվող փոփոխությունների մասին՝ նա նշեց. «Մասնավորապես անդրադարձ է կատարվել աշխատանքի ընդունման հետ կապված հարաբերություններին: Այսինքն՝ աշխատանքի ընդունման երկու փաստաթուղթ կա՝ աշխատանքային պայմանագիր եւ աշխատանքի ընդունման անձի անհատական իրավական ակտ: Հստակ տարանջատվել են այս երկու հնարավորությունները, հստակեցվել է, որպեսզի տարընթերցումները չխոչընդոտեն աշխատանքային հարաբերությունների ձեւավորմանը»:
Մյուս փոփոխությունը, ըստ քննարկման մասնակցի՝վերաբերում է հատուկ կամ մասնագիտական ստաժային հասկացությանը. «Հստակ սահմանվել է, որովհետեւ դա շատ կարեւոր է հետագայում կարիերան ձեւավորելու համար: Սահմանվել է աշխատանքային տարի հասկացությունը, որովհետեւ կապված է արձակուրդի իրավունքի իրացման հետ եւ այլ աշխատանքային իրավունքների իրացման հետ:
Աշխատանքային գրքույկ վարելու պարտավորությունն է հանվել, որովհետեւ ժամանակակից պայմաններում կա այդ հնարավորությունը, տեղեկատվական տեխնոլոգիաները հնարավորություն են տալիս հաշվառել աշխատողի տվյալները եւ ունենալ աշխատանքային պատմությունը: Հստակ կարգավորվել է փորձաշրջանի ժամկետն ավարտելուց հետո աշխատանքային հարաբերությունների հետագա ընթացքը, այսինքն՝ այսօր օրենսգրքով հստակ նշված է փորձաշրջան մինչեւ երեք ամիս, դրանից հետո աշխատանքային նոր պայմանագիր կնքե՞լ աշխատողի հետ, թե՞ այդ պայմանագիրն է շարունակվում, այսպիսի խնդիրներ են առաջանում»:
Ուշադրության արժանի օրենսդրական կարգավորումներից է մինչեւ 14 տարեկան երեխաների աշխատանքի հետ կապված հարաբերությունների ձեւավորումը, որը գործող օրենքով կարգավորված չէ: «Գիտենք, ինչպես մեր երկրում, այնպես էլ պրակտիկայում, 14 տարեկան երեխաների աշխատանքը կամ որոշակի ծառայությունների մատուցումը որոշակի ոլորտներում՝ սպորտ, մշակույթ եւ այլ, կա եւ կարգավորման անհրաժեշտություն կա: Նախագծով առաջարկվում է շատ հստակ կարգավորում, թե երեխաները որ ոլորտում կարող են աշխատել, թե աշխատաժամանակի կարգավորումը՝ ժամաքանակի, եւ հանգստի ժամանակի»,- ասում է պարոն Ավետիսյանը, նշում, որ կարգավորումը հնարավորինս մոտեցված է միջազգային չափանիշներին:
Քննարկման այլ մանրամասներ՝ առաջիկայում:
Հռիփսիմե ՀՈՎՀԱՆՆԻՍՅԱՆ
