Մինչև սեպտեմբերի 15-ը «Նաիրիտ» գործարանի աշխատակիցները մեկ ամսվա աշխատավարձ կտանան: Այսօր խորհրդարանում իր խոստումը վերահաստատեց ՀՀ էներգետիկայի և բնական պաշարների նախարար Երվանդ Զախարյանը:
Նախարարը խուսափեց լրագրողներին մանրամասներ ներկայացնել այն մասին, թե ի՞նչ փաթեթ է մշակում կառավարությունը, որ մինչև սեպտեմբերի 15-ը պետք է ներկայացնի գործարանի աշխատակազմին. «Ես ասել եմ, ինչի՞ եք ուզում, որ կրկնեմ: Ամսի 15-ից հետո ես կմանրամասնեմ, ձեզ շատ մանրամասն կասեմ»:
Անդրադառնալով գործարանի տնօրենին աշխատանքից ազատելու հարցին՝ նախարարն ասաց, որ նա իր դիմումի համաձայն է ազատվել աշխատանքից: Լրագրողներից մեկը հետաքրքրվեց`արդյո՞ք չարաշահումների հետ է կապված այդ պաշտոնանկությունը, Երվանդ Զախարյանը պատասխանեց. «Ոչ»: Լրագրողներից մեկն էլ հետաքրքրվեց` կառավարությունը բացահայտեց՝ ովքե՞ր են «Նաիրիտն» այս վիճակին հասցրել, ինչպես խոստացել էր վարչապետ Հովիկ Աբրահամյանը, Երվանդ Զախարյանը պատասխանեց. «Այդ հարցով դիմեք իրավապահ մարմիններին»:
Նելլի ԳՐԻԳՈՐՅԱՆ
