«Լեւոն, իշխանափոխություն վերեւից ներքեւ, հենց հիմա՛»,- այսօր Վանաձորում եռյակի հանրահավաքի ժամանակ ՀԱԿ խմբակցության ղեկավար Լեւոն Զուրաբյանի ելույթից առաջ նրան այսպիսի կոչով դիմեց վանաձորցիներից մեկը: Լեւոն Զուրաբյանն էլ պատասխանեց. «Բա դրա համար ենք հավաքվել, որ իշխանափոխություն անենք»:
Վանաձորի հանրահավաքն անցնում էր անձրեւի տակ, ուստի Լեւոն Զուրաբյանը վանաձորցիներին պատրաստեց, որ հոկտեմբերի 10-ի հանրահավաքին էլ կարող է վատ եղանակային պայմաններ լինեն, չմոռանան վերցնել անձրեւանոցները. «Չինաստանում տեսնո՞ւմ եք, անձրեւանոցը դարձել է հեղափոխության սիմվոլը»:
ՀԱԿ խմբակցության քարտուղար Արամ Մանուկյանն իր ելույթում անդրադարձավ արտագաղթի խնդրին: Նա ասաց, որ մեր երկրում ոչ մի մասնագետ այլեւս չի մնացել՝ տրակտորիստներից սկսած բոլորը գնում եւ գնում են. «Գազը թանկացավ, հոսանքը թանկացավ, ուսման վարձը թանկացավ: Լսեք, սեղմելու են այնքան, ինչքան կսեղմվես: Հաղթանակը հաղթանակ է բերում, մենք քնած ենք, լսեք, հելե՛ք, ոտքի՛ ելեք, ամոթ է»:
Նա նշեց, որ մեր օրերում ցեղասպանություն է լինում. «Հերիք եղավ, բոլ եղավ: Մենք գնում ենք ու մենք սկսում ենք ամսի 10-ին: Ով չեկավ ու տեր չկանգնեց այս երկրին՝ ամոթ նրան»:
Կարդացեք նաև
Հռիփսիմե ՋԵԲԵՋՅԱՆ
