Աշխարհահռչակ հայազգի դիրիժոր, երաժիշտ Ջորջ Փեհլիվանյանը կրկին ժամանել է Հայաստան՝ վաղը Ալեքսանդր Սպենդիարյանի անվան օպերայի եւ բալետի ազգային ակադեմիական թատրոնում ներկայացնելու Բեթհովենի 9-րդ սիմֆոնիան՝ օպերային թատրոնի սիմֆոնիկ նվագախմբի եւ երգչախմբի մասնակցությամբ:
Այսօր լրագրողները հանդիպեցին դիրիժորին, սակայն մինչ զրույցը, մենք հնարավորություն ունեցանք ունկնդրելու վաղվա համերգին ներկայացվող Բեթհովենի 9-րդ սիմֆոնիայի փորձը:
Փորձից հետո լրագրողների հետ ճեպազրույցում Ջորջ Փեհլիվանյանը նշեց, որ ինքը առաջին անգամ է ղեկավարում օպերային թատրոնի սիմֆոնիկ նվագախումբը եւ երգչախումբը. «Նաեւ առաջին անգամ է, որ հենց օպերայի եւ բալետի թատրոնում եմ ելույթ ունենում: Մայրս էլ է այստեղ ելույթ ունեցել, նա 1960-ական թվականներին Անուշի դերն է խաղացել եւ հիմա հիսուն տարի հետո ես եմ գալիս եւ նույն հոգով համերգ եմ տալու իմ ժողովրդի համար»:
Դիրիժորը պատմեց, որ ինքը Բեթհովենի 9-րդ սիմֆոնիան ներկայացրել է բազմաթիվ երկրներում եւ հույս ունի, որ այս երաժշտության միջոցով կկարողանա իրար կապել ամբողջ աշխարհում բնակվող հայությանը. «Մանավանդ 2015 թվականին Հայոց ցեղասպանության 100-ամյակին ընդառաջ մենք պետք է ամբողջ աշխարհին կոչ անենք, որ այստեղ ենք, դիմում ենք եւ լսելի դարձնում մեր ձայնը»:
Կարդացեք նաև
Ինչպես ներկայացրեց դիրիժորը՝ իր կազմակերպած «Touquet International Music Masters» փառատոնի շրջանակներում ինքը նախաձեռնել է Հայոց ցեղասպանության 100-ամյա տարելիցին նվիրված բազմաթիվ միջոցառումներ . «Մի քանի կարեւոր նախագծեր ունեմ Հայաստանի երիտասարդ երաժիշտների համար: Ամենակարեւորն այն է, որ Ֆրանսիայում կազմակերպած իմ փառատոնի ընթացքում հյուրախաղերով հանդես կգանք Հայաստանի պետական երիտասարդական նվագախմբի հետ:
Ես խնդրել եմ նաեւ կոմպոզիտոր Վաչե Շարաֆյանին պատանիների երգչախմբի համար նոր ստեղծագործություն գրել, որը հայ երեխաները ֆրանսիացի երեխաների հետ միասին կկատարեն ե՛ւ Ֆրանսիայում, ե՛ւ Հայաստանում»:
Պրն Փեհլիվանյանի խոսքով՝ դիվանագիտական նպատակներով են կազմակերպվում այս համերգները, որպեսզի աշխարհում լսելի լինի հայերի ձայնը եւ որ ճանաչեն Հայոց ցեղասպանությունը:
Տեսանյութում ներկայացված է Բեթհովենի 9-րդ սիմֆոնիայի փորձից մի փոքր հատված
Համերգը տեղի կունենա վաղը՝ ժամը 19:00-ին:
Էլյա ՀՈՎՀԱՆՆԻՍՅԱՆ
