Դեկտեմբերի 12-ին Երևանի պետական բժշկական համալսարանում (ԵՊԲՀ) սովորող բազմազգ ուսանողները ներկայացրին իրենց երկրների (Հայաստան, Արցախ, Ռուսաստան, Վրաստան, Հնդկաստան, Իրան, Ղազախստան, Հորդանան, Լիբանան, Ուկրաինա, Թուրքմենստան, Մոլդովա, ԱՄՆ) մշակույթը, խոհանոցը, տարազը։
«Բարեկամություն» խորագիրը կրող ծրագիրը բժշկական համալսարանի ուսանողական խորհրդարանի ավանդական միջոցառումներից է։ ԵՊԲՀ ռեկտորի խորհրդական Կարեն Ակոպյանը նշեց, որ այս միջոցառման սկիզբը դրվել է 2003-2004 թվականներին, և նպատակն է՝ տարբեր երկրների ուսանողների միջև ստեղծել մշակութային կապեր, համագործակցություն։ Նշենք, որ Երևանի պետական բժշկական համալսարանում սովորում է ավելի քան 1300 արտասահմանցի ուսանող՝ 13 երկրից։
Իրանահայ Վանանդ Գևորգյանը ներկայացնում է Իրանի Իսլամական Հանրապետությունը։ Ծանոթացնելով պարսկական ուտեստների հետ՝ առանձնացնում է դրանցից մեկը՝ որմեսապզի կոչվող կերակուրը, և պատմում, որ Իրանում ամուսնանալ ցանկացող տղամարդիկ հարսնացուին առաջին հերթին հարցնում են՝ կարո՞ղ է պատրաստել որմեսապզի։ Եթե՝ այո′, ապա միայն այդ դեպքում են աղջկան կնության առնում։ Վանանդն ասում է, որ պետական բժշկական համալսարանում շատ են իրանահայ, նաև պարսիկ ուսանողները։ Նրանք Հայաստան են գալիս, որովհետև այստեղ կարողանում են լավ ուսում ստանալ։
Կարդացեք նաև
Նշենք, որ «Բարեկամություն» ծրագիրը կազմակերպել են Հայաստանի երիտասարդական հիմնադրամը և ԵՊԲՀ ուսանողական խորհրդարանը։
Հայաստանի երիտասարդական հիմնադրամի
հասարակայնության հետ կապերի ծառայություն
