Այս տարվա հունվարի մեկից մինչեւ հունվարի 11-ը շտապօգնությունում գրանցված կանչերի ընդհանուր քանակը եղել է 8275, որը 100 կանչով պակաս է, քան 2014 թվականի այս նույն ժամանակահատվածում: Այս տվյալները այսօր լրագրողների հետ հանդիպմանը «Պոստ Սկրիպտում» մամուլի ակումբում հայտնեց «Շտապբուժօգնություն» ՓԲԸ տնօրեն Թագուհի Ստեփանյանը:
Գրանցված կանչերի արդյունքում հիվանդանոց է տեղափոխվել միայն 750-ը, նշում է բանախոսը: Մանկական կանչերի արդյունքում գրանցվել է 1446 հիվանդ, որոնցից հիվանդանոց է տեղափոխվել 203-ը:
Թագուհի Ստեփանյանը նշեց, որ նոր տարվա առաջին տասնօրյակում կանչերը գրանցվել են սիրտ անոթային հիվանդությունների, սուր շնչառական հիվանդությունների եւ վնասվածքների համար:
Aravot.am-ի դիտարկմանը, թե հանրապետության գլխավոր թունաբանը պնդում է, որ այս տարի շատ են եղել ալկոհոլից թունավորման դեպքերը, բանախոսը պատասխանեց. «Այն, ինչ վերաբերում է թունավորումներին՝ ալկոհոլային թունավորումներին, նման կանչեր գրեթե չենք ստացել: Միգուցե, ով թունավորվել է, իր միջոցներով է գնացել հիվանդանոց: Այս տարի մեզ մոտ չեն գրանցվել սննդային եւ ալկոհոլային թունավորման դեպքեր»:
Կարդացեք նաև
Ամենաշատ կանչերի թիվը գրանցվել է հունվարի 5-ին՝ 831 զանգ, որը դժվարացրել է շտապօգնության աշխատանքը. «Եղել է այնպիսի իրավիճակ, որ մենք րոպեն մեկ կանչ ենք ստացել»:
Թագուհի Ստեփանյանի խոսքով՝ այս տարի կանչերի թիվը պակասել էր, բայց ավելացել էր հիվանդների տեղափոխման թիվը հիվանդանոց.«Սա շտապօգնության աշխատանքի համար գնահատվում է որպես դրական ցուցանիշ»:
Էլյա ՀՈՎՀԱՆՆԻՍՅԱՆ
