Վարդենիսի բժշկական կենտրոնի բժիշկներ Սուսաննա Մակարյանն ու Արթուր Ղազարյանը, ինչպես իրենց կոլեգաներն են բնորոշում` հերոսություն են կատարել: Այս տարվա հունվարի 10-ին բուժկենտրոնը Ախպրաձոր գյուղից կանչ է ստացել, որ գյուղում ջերմող երեխաներ կան, եւ երբ փրկարարների ուղեկցությամբ ճանապարհվել են գյուղ, ճանապարհի կեսից պարզվել է, մեքենաներն այլեւս չեն կարող այն շարունակել, ճանապարհն անանցանելի է:
Բժիշկները որոշել են այդ բուք ու բորանին ոտքով հասնել գյուղ, եւ -21 աստիճան ցրտին բժիշկները ոտքով 4 կիլոմետր ճանապարհ են անցել, որպեսզի հասնեն հիվանդ երեխաներին:
Այսօր առողջապահության նախարարությունում բժիշկները լրագրողներին պատմեցին, որ դեռ ճանապարհին էին, երբ նորից գյուղից զանգահարում են եւ տեղեկացնում, որ հղի կին կա, լավ չի զգում իրեն, խնդիրներ ունի:
«Գյուղից անընդհատ ահազանգեր էին լինում հղիի մասին, ասում էին` էրեխեն տրաքավ, վայ շուտ հասեք, վայ էրեխեն հեսա ծնվավ, դուք դեռ չեք հասնում»,-պատմեց բժիշկ Սուսաննա Մակարյանը:
Կարդացեք նաև
Շտապօգնության բժիշկ, տիկին Մակարյանի ներկայացմամբ` երբ արդեն հասել են գյուղ, այցելել հղիին, եւ, ճիշտ է, առաջին բուժօգնությունը ցուցաբերել է, սակայն նեղ մասնագիտական խնդիրներ կային, ուստի դիմել են բուժկենտրոնի մանկաբարձ-գինեկոլոգին, որին էլ տրակտորով են հասցրել հղիի մոտ:
Հիվանդ հղիին աջակցության հարցում մասնակցել է նաեւ Մոր եւ մանկան առողջության պահպանման գիտահետազոտական կենտրոնի տնօրեն մանկաբարձ-գինեկոլոգ Գեւորգի Օկոեւը, որը «սկայպի» միջոցով մասնագիտական ցուցումներ է տվել Վարդենիսի բժիշկներին:
Aravot.am-ի հարցին, արդյոք նման դեպք իրենց պրակտիկայում հիշո՞ւմ են բժիշկները, Օկոեւն ասաց, որ խաղաղ պայմաններում` ոչ:
Իսկ եթե բժիշկներն ուշանային եւ չկարողանային ժամանակին բուժօգնություն ցուցաբերել հղիին, ապա, ինչպես ասուլիսին ներկա մասնագետներն ասացին` հնարավոր էր` վաղաժամ ծննդաբերություն, նույնիսկ` պտղի մահ:
Նշենք, որ Վարդենիսի բուժկենտրոնից նախարարության մասնագետները կազմակերպել են հղի կնոջ տեղափոխումը Պերինատոլոգիայի, մանկաբարձության եւ գինեկոլոգիայի հանրապետական ինստիտուտ, ներկայումս հղին ստանում է անհրաժեշտ բուժումը։
Այսօր առողջապահության նախարարությունը բժիշկներ Սուսաննա Մակարյանին, Արթուր Ղազարյանին եւ Սամվել Ղուռուշտանյանին պարգեւատրեց պատվոգրով` մասնագիտական պարտականությունները կատարելիս անձնական խիզախություն ցուցաբերելու եւ բժշկի մասնագիտական պարտքը պատվով կատարելու համար:
Նելլի ԲԱԲԱՅԱՆ
