«Ճանապարհային ոստիկանություն» ծառայության պետ, ոստիկանության գեներալ-մայոր Արտակ Հարությունյանը փետրվարի 2-ին լրագրողների հետ հանդիպման ընթացքում ասաց, որ 2014 թվականի կարեւոր ձեռքբերումներից է համարում ճանապարհատրանսպորտային պատահարների ծանրության գործակցի նվազումը:
Նա նշեց, որ 2010 թվականին այդ գործակիցը եղել է 10, 2011 թվականին այդ ցուցանիշը եղել է 8.9, 2012 թվականին եղել է 7.7, 2013 թվականին՝ 7.3, իսկ 2014 թվականին՝ 6.2. «Ինչպես նկատում ենք այս հարցում նույնպես մենք շարժընթացի դրական միտում ենք նկատում: Մենք համեմատություններ ենք անում նաեւ ԱՊՀ երկրների կտրվածքով, կարող եմ ասել, որ Հայաստանի Հանրապետությունը, ի տարբերություն մյուս ԱՊՀ երկրների, էական տարբերություն ունի ծանրության գործակցի հետ կապված: Օրինակ՝ Ադրբեջանում վերջին տվյալը 29.6 է»:
Արտակ Հարությունյանը, անդրադառնալով համակարգում կոռուպցիայի առկայությանը՝ նշեց, որ քաղաքացիները նույնպես գնում են այդ քայլին, եւ երբեմն դա տեղի է ունենում քաղաքացու դրդմամբ. «Մեր բարեփոխումների ծրագրի ամենակարեւոր կետն է հանդիսանալու ինչքան հնարավոր է նվազագույնի հասցնել տեսուչ-քաղաքացի շփումը, որովհետեւ կոռուպցիան գոյություն ունի այնտեղ, որտեղ մարդը մարդուն է հանդիպում: Մեր ծրագիրն արդեն մշակված է, եթե կարողանանք նվազագույնի հասցնել տեսուչ-ոստիկան շփումը, ես կարծում եմ, կոռուպցիոն ռիսկերի եւ դրսեւորումների հետ կապված շատ հարցեր ինքնըստինքյան դուրս կգան արարքից»:
Ամի ՉԻՉԱԿՅԱՆ
