Այսօր «Նյութ» ակումբում «Ժառանգության» առաջնորդ Րաֆֆի Հովհաննիսյանի ասուլիսն էր նախատեսված, բայց նրա փոխարեն ասուլիսի էր եկել «Ժառանգության» փոխնախագահ Արմեն Մարտիրոսյանը:
Նա ասաց, որ Րաֆֆի Հովհաննիսյանը նույն ակումբում ասուլիս կտա, իր խոսքը կասի, ուղղակի երեկվա Սերժ Սարգսյանի ելույթից հետո երկրում իրավիճակ է փոխվել:
Արմեն Մարտիրոսյանը «Ժառանգության» անունից հայտարարություն արեց. «Երեկ Սերժ Սարգսյանի ելույթը ՀՀԿ խորհրդի նիստում նախագահի պաշտոնը զբաղեցնող անձին վայել ելույթ չէր»:
Հարցին՝ Դուք դո՞ւրս եք գալու եռյակից, Արմեն Մարտիրոսյանը պատասխանեց. «Ես նման բա՞ն ասացի: Եռյակը քննարկման փուլում է: Քաղաքական պրոցեսներ են փոխվել, արագանում են, կարող է իշխանափոխությունը արագանա, կարող է ՀՀ-ի՝ Հյուսիսային կորեացումն արագանա»:
Կարդացեք նաև
Հարցին՝ Եռյակը հնարավո՞ր է Սերժ Սարգսյանի հրաժարականը պահանջի՝ Արմեն Մարտիրոսյանը պատասխանեց, որ քննարկումները ցույց կտան. «Այնուամենայնիվ, կարծում եմ այդ քննարկումները կլինեն»:
Հարցին՝ դա ճնշո՞ւմ էր եռյակի նկատմամբ՝ պարոն Մարտիրոսյանը պատասխանեց, որ նախնական գնահատական արդեն տվել է:
Պարոն Մարտիրոսյանն իր անձնական տեսակետը հայտնեց. «Քաղաքականությամբ պետք է զբաղվեն քաղաքական գործիչները, որոնք ունեն ժողովրդի որոշակի վստահությունը եւ ամեն մի պաշտոնատար անձ զբաղեցնի այդ պաշտոնն ըստ ստացած քվեի»:
Հարցին՝ Գագիկ Ծառուկյանն ունի՞ այդ վստահությունը՝ նա պատասխանեց. «Ես ժողովրդավարության այբուբենը հարգող անձնավորություն եմ, այս մոտեցումն եմ միշտ ունեցել՝ կարեւոր չէ թե ով է, այլ կարեւորը՝ ինչպես է: Այսինքն, ունի՞ ժողովրդի վստահության քվեն, թե՞ ոչ: Ես կարծում եմ, որ ՀՀ յուրաքանչյուր քաղաքացի, ում 35 տարին լրացել է, ով վերջին 10 տարում բնակվել է ՀՀ-ում, ՀՀ քաղաքացի է, ունի ժողովրդի մեծամասնության քվեն, նա կարող է լինել ՀՀ նախագահ: Այն անձը, որը կուսակցության ցուցակով մասնակցել է ԱԺ ընտրություններին եւ իր կուսակցությունը ստացել է ժողովրդի վստահության քվեն որոշակի չափանիշներով եւ այդ անձը ցուցակում անցողիկ տեղում է գտնվում, նրա 25 տարին լրացել է, 5 տարի ՀՀ քաղաքացի է, վերջին 5 տարում ՀՀ տարածքում է բնակվում, ուրեմն նա պետք է լինի ԱԺ պատգամավոր»:
Արմեն Մարտիրոսյանն ասաց, որ «Ժառանգության» նկատմամբ էլ են ճնշումներ եղել, այդ գործիքակազմը վաղուց է կիրառվել:
Հարցին՝ ո՞րն է ավելի հավանական՝ ՀՀ-ի Հյուսիսային կորեացո՞ւմը, թե՞ իշխանափոխությունը՝ Արմեն Մարտիրոսյանն ասաց, որ դա կախված է հասարակությունից. «Ելույթը գնահատում եմ որպես իրական միակուսակցական պետություն դառնալու քայլ»:
Հռիփսիմե ՋԵԲԵՋՅԱՆ
