Եվրոպայի խորհրդի (ԵԽ) մարդու իրավունքների հարցերով հանձնակատար Նիլս Մուժնիեկսը Ստրասբուրգում նախարարների խորհրդում ներկայացրել է զեկույց, որտեղ ամրագրված են իր`անդամ երկրներ այցելությունների և դիտարկումների արդյունքները:
Զեկույցում անդրադարձ է կատարվում ահաբեկչության կանխարգելման, մարդու իրավունքների և ազատությունների, արդար դատական համակարգի ապահովման, գենդերային խտրականության կանխարգելման խնդիրներին:
26 էջանոց զեկույցում երկու էջ նվիրված է Հայաստանին, որտեղ հանձնակատարը մտահոգություններ է հայտնում ՀՀ-ում անկախ դատական համակարգի, մարդու իրավունքների և ազատությունների ապահովման, դատավորների անկախության և այլ հարցերի շուրջ:
Նիլս Մուժնիկսը այցելել է Հայաստան հոկտեմբերի 5-9-ը: Նա իր պաշտոնական հանդիպումներում և Վանաձոր այցելության ընթացքում շեշտել է դատավորների անկախության, նրանց` անհարկի միջամտություններից զերծ պահելու անհրաժեշտության մասին: Դատավորների ընտրության, նշանակման և ազատման հարցում հանձնակատարը կարևորել է դատական անկախ ինքնակառավարման համակարգի ապահովումը: Պարոն Մուժնիեկսը նաև մտահոգություն է հայտնում անձանց նախնական կալանքի տակ պահելու հարցում եղած անօրինությունների և խտրականությունների մասին:
Կարդացեք նաև
Հանձնակատարի մտահոգության առարկան է դարձել նաև ոստիկանական մարմինների կողմից անձանց բռնության ենթարկելը, նրանց անհարկի կալանքի տակ պահելը: Ըստ հանձնակատարի` խոշտանգումը որպես հանցագործություն, միջազգային չափանիշներին համապատասխան, պետք է մաս կազմի քրեական օրենսդրության:
Նիլս Մուժնիեկսը մտահոգություն է հայտնում նաև այն մասին, որ ոչ բավարար քայլեր են կատարվել մարտի 1-ի հանցագործներին բացահայտելու և պատասխանատվության ենթարկելու հարցում: Նա այդ հարցում առաջընթաց չի նկատում:
Հանձնակատարն իր գոհունակությունն է հայտնել 2003-ին «Կանանց և տղամարդկանց հավասար իրավունքների և հավասար հնարավորությունների ապահովման մասին» ՀՀ օրենքի ընդունման հարցով` այն համարելով ճիշտ քայլ: Հանձնակատարը հատուկ շեշտել է ընդդեմ խտրականությանը օրենքի ընդունման անհրաժեշտությունը, ինչպես նաև անհրաժեշտություն տեսել ընտանեկան բռնությանն ուղղված օրենսդրության ապահովման հարցում: Ըստ նրա`ՀՀ-ում ընտանեկան բռնության դեպքերի բացահայտումը, հետաքննությունն ու կանխումը ոչ բավարար մակարդակի վրա է:
Անդրադարձ կա նաև Ադրբեջանում գոյություն ունեցող իրավիճակին: Զեկույցի`Ադրբեջանի հատվածն ավելի խիստ է. մասնավորապես կոչ է արվում դադարեցնել մարդու իրավունքների պաշտպանությամբ զբաղվող անձանց հետապնդումները, ապահովել խոսքի ազատություն և մարդու իրավունքների պաշտպանություն:
Տաթև ՀԱՐՈՒԹՅՈՒՆՅԱՆ
