Արա Պապյանի կարծիքով՝ մինչեւ հիմա քրդական պետություն չի ստեղծվել, քանի որ հիմնական դերակատարները դեռեւս վերջնական որոշում չեն ընդունել:
«Այսօր թուրքական պետությունը լուծում է իր լինել-չլինելու հարցը»,- մարտի 18-ին «Նյութ» մամուլի ակումբում լրագրողների հետ հանդիպման ընթացքում ասաց «Մոդուս վիվենդի» կենտրոնի ղեկավար Արա Պապյանը:
Նա համարում է, որ քրդական գործոնը կարող է մահացու հարված հասցնել Թուրքիայի ներկայիս սահմաններին. «Թուրքերը, որ խելք ունենային, ընդհանրապես կհրաժարվեին այդ ամենից, կստեղծեին փոքր, սիրուն, կարգին, կոմպակտ երկիր ու կապրեին: Այսօր Թուրքիան գնում է քայլերի հույսով, որ քրդական գործոնը չի հասնի այդ աստիճանի, եւ այդ նոր գործոնի դեմ իրենք կկարողանան ինչ-որ հակակշիռներ ստեղծել»:
Ըստ նրա՝ մինչեւ հիմա քրդական պետություն չի ստեղծվել, քանի որ հիմնական դերակատարները դեռեւս վերջնական որոշում չեն ընդունել. «Ամերիկայի հզորությունը նրանում է, որ նա, լինելով հարուստ երկիր, կարողանում է իրարամերժ քաղաքականություն իրականացնել, այսինքն՝ մի կողմից Թուրքիան ՆԱՏՕ-ի անդամ երկիր է, մյուս կողմից՝ ինքը նաեւ զարգացնում է քրդական գործոնը: Այսօր քրդերին Միացյալ Նահանգներն է զինում, ճիշտ է՝ զինում է Իսլամական պետության դեմ, բայց ակնհայտ է՝ երբ զինում ես եւ կիսապետական կառույց ես ստեղծում, դա գործիք է եւ կարող է օգտագործվել: Թուրքիայի դժգոհությունը Արեւմուտքից նրանում է, որ այդ գործիքը կա եւ կարող է իր դեմ օգտագործվել եւ կարող է դուրս գալ վերահսկողությունից»:
Կարդացեք նաև
Ամի ՉԻՉԱԿՅԱՆ
