Ադրբեջանում գերեւարված ԼՂՀ պաշտպանության բանակի պայմանագրային զինծառայող Արսեն Բաղդասարյանի գործով առաջին դատական նիստը տեղի կունենա ապրիլի 7-ին Ադրբեջանի Գյանջինսկի դատարանում: Ադրբեջանական «Apa» գործակալության փոխանցմամբ՝ նա մեղադրվում է ծանր հանցագործություն կատարելու մեջ:
Հիշեցնենք, որ դեկտեմբերի 27-ին ադրբեջանական լրատվամիջոցները հղում անելով այդ երկրի ռազմական գերատեսչությանը՝ հաղորդել էին, թե իբր դեկտեմբերի 26-ին` երեկոյան, ազերիների զինուժը կանխել է Աղդամի ուղղությամբ հայկական հետախուզական խմբի առաջխաղացումը, որի հետեւանքով պրոֆեսիոնալ զինվորական Արսեն Էդուարդի Բաղդասարյանը գերվել է:
Ավելի ուշ տարածած հաղորդագրությամբ պաշտպանության բանակը հերքել էր դիվերսիայի մասին լուրը եւ նշել, որ Արսեն Բաղդասարյանը հանդիսանալով ՊԲ պայմանագրային զինծառայող, պարբերաբար ինքնակամ լքել է իր մշտական տեղակայման վայրը, որի համար հրամանատարության որոշմամբ, կարգապահական խախտումներ կատարելու հիմնավորմամբ, ժամանակավորապես հեռացված է եղել ծառայությունից:
Պատրաստեց Աշոտ ԻՍՐԱԵԼՅԱՆԸ
