ԱԺ վերջին քառօրյա նիստերի ընթացքում քննարկվեց գազի հանձնաժողովի զեկույցը: Հանձնաժողովի աշխատանքների մասին եռյակի անդամները հակասական կարծիքներ էին հայտնում: Մասնավորապես, եռյակի անդամների կարծիքների հետ հակասության մեջ էր ՀԱԿ-ի դիրքորոշումը: ԲՀԿ խմբակցությունն ասաց, որ հանձնաժողովը շատ լավ է աշխատել, նույնիսկ Միքայել Մելքումյանը քննադատեց հանձնաժողովը վատաբանողներին: ՀԱԿ-ն ասաց, որ չեն ստացել այն արդյունքը, ինչ ուզում էին ստանալ, իսկ «Ժառանգությունը» հանձնաժողովի նախագահ Վարդան Այվազյանի չարչարանքին ապաշխարանք մաղթեց ու գոհունակություն հայտնեց նրան:
Aravot.am-ի հարցին՝ Եռյակն այլեւս խորհրդարանական համագործակցության չի՞ գնում, չկա՞ կոնսենսուս՝ ՀԱԿ խմբակցության ղեկավար Լեւոն Զուրաբյանը պատասխանեց. «Նախ, մենք որեւէ փորձ չենք արել այս հարցում կոնսենսուսի գալ: Մենք ընդամենը արտահայտել ենք մեր կարծիքը»:
Մեր հարցին՝ այլեւս չե՞ք համագործակցելու եռյակի հետ՝ Լեւոն Զուրաբյանը պատասխանեց. «Կարծում եմ, որ պետք է սպասել, որ որոշ գործընթացներ ավարտվեն, այդ թվում՝ ԲՀԿ-ում: Դրանից հետո պարզ կլինի՝ մենք կարո՞ղ ենք համագործակցել, թե՞ չէ»:
Հռիփսիմե ՋԵԲԵՋՅԱՆ
