Ռուսաստանի նախագահ Վլադիմիր Պուտինի հերթական ուղիղ կապ-ասուլիսի ընթացքում զավեշտալի դեպք տեղի ունեցավ: Ելենա անունով մի կին նրան այսպիսի խնդրանք հղեց. «Իմ ընկերուհին ապրիլի 25-ին դառնում է 40 տարեկան: Նա շատ է ուզում շուն նվեր ստանալ: Մենք՝ նրա ընկերուհիները, պատրաստ ենք գնել, իսկ ամուսինը դեմ է: Նա պահեստազորի գնդապետ է, երկաթե մարդ է, ինչպես մեր բոլոր զինվորականները: Սակայն գերագույն գլխավոր հրամանատարին չի կարող մերժել: Խնդրում եմ, ուղղակի ասացեք. «Բորիս, դու սխալ ես: Թույլ տուր կինդ շուն ունենա»:
Ի պատասխան՝ Պուտինն ասաց, որ իրեն շատ վատ վիճակի մեջ են դնում. «Մեզ մոտ, իհարկե, մարդիկ հատուկ վերաբերմունք ունեն զինվորականների նկատմամբ, հատկապես՝ կանայք, քանի որ նրանք իսկական տղամարդիկ են: Գիտեք, բայց ես ոչինչ չեմ կարող հրամայել: Բորիսը ունի հիմքեր ասելու, որ ավելի լավ է դու քեզ մոտ ամեն ինչ կարգավորիր եւ ճիշտ կլինի»:
Փոխարենը Պուտինն առաջարկեց Ելենայի հետ միասին գործողությունների ծրագիր մշակել. «Օրինակ` մենք Ձեզ հետ կարող ենք խնդրել Բորիսին ընդառաջ գնալ կնոջը: Իսկ կինը կարող է ասել, որ իրեն շուն պետք չէ եւ կանի այնպես, ինչպես ամուսինն է ուզում: Դրանից հետո ամուսինը կնոջը ոչ միայն շուն, այլեւ փիղ կնվիրի: Հնարավոր է նաեւ, որ մորթյա վերարկու էլ խոստանա»:
Աշոտ ԻՍՐԱԵԼՅԱՆ
