Այսօր Շիրակի մարզի ընդհանուր իրավասության դատարանի Մարալիկի նստավայրում սկսվեց անցած տարվա նոյեմբերի 10-ին Երևան-Գյումրի ավտոճանապարհի 102-րդ կիլոմետր հատվածում՝ Արթիկի տարածաշրջանի Հոռոմ գյուղի խաչմերուկում տեղի ունեցած վթարի գործով քննությունը: Հիշեցնենք, որ միմյանց էին բախվել 45-ամյա Մանվել Վարդանյանի վարած «Իմեքս գրուպ» ՍՊԸ հաշվեկշռում գտնվող «Կամազ» մակնիշի ու «Տրանս ակնթարթ» ընկերությանը պատկանող, Ռազմիկ Մկրտչյանի կողմից վարած «Գազել 32» մակնիշի ավտոմեքենաները: «Գազել 32»-ը սպասարկում էր Երևան -Գյումրի երթուղին: Վթարի հետևանքով գազելը այրվել էր. 7 ուղևորներ մահացել էին տեղում, իսկ 7-ը տարբեր աստիճանի մարմնական վնասվածքներով տեղափոխվել էին Գյումրու բժշկական կենտրոն: ՀՀ քրեական օրենսգրքի 242 հոդվածի 3-րդ մասի հատկանիշներով քրեական գործ էր հարուցվել «Կամազի» վարորդ Մանվել Վարդանյանի նկատմամբ եւ խափանման միջոց կիրառվել կալանավորումը: Նա այժմ գտնվում է Արթիկ քրեակատարողական հիմնարկում:
Այսօրվա դատական նիստը հետաձգվել է, տուժող կողմի իրավահաջորդներից ու վկաներից մի քանիսի դատարան չներկայանալու ու նաև ամբաստանյալ Մանվել Վարդանյանի՝ մեղադրական եզրակացությունը չստանալու պատճառով: Վերջինիս մեղադրական եզրակացությունը տրամադրվել է այսօր: Այս մասին Aravot.am-ին տեղեկացրեց Մանվել Վարդանյանի փաստաբան Լիանա Բալյանը: «Հայտնեմ, որ շատ դժգոհ եմ նախաքննությունից, արդեն իսկ վիճարկել եմ փորձաքննության որոշումները, ինչպես նաև դատարանին եմ ուղարկել միջնորդություններ համալիր կրկնակի փորձաքննություններ նշանակելու մասին: 2015 թվականի ապրիլի 13-ին ես դիմում եմ ուղարկել գլխավոր դատախազ Գևորգ Կոստանյանին այն մասին, որ քրեական գործն ավարտվել է և քրեական գործի ավարտման պահին ծանոթացել եմ գործի նյութերին, ծանոթացման ընթացքում հայտնաբերեցի, որ քրեական գործում առկա է 2014 թվականի նոյեմբերի 11-ի արձանագրությունը առգրավում կատարելու մասին: Առգրավում կատարելու որոշման մեջ նշված էր, որ «Հենզելն Ազատ» ՍՊԻ-ի՝ Երևան-Գյումրի ավտոճանապարհին 107 կիլոմետր հատվածում գազալցակայանում տեղադրված տեսանկարահանման սարք է եղել: Քննիչը ընթերականներ Դավիթ Շոխուրջյանի և Խաչատուր Խաչատրյանի մասնակցությամբ առգրավվել է «Հենզելն Ազատ» ՍՊԻ-ի Երևան-Գյումրի ավտոճանապարհին 107 կիլոմետր հատվածում գազալցակայանում տեղադրված տեսանկարահանման սարքը: Քաշուր Խաչատրյանը՝ գազալցակայանի տնօրենը, հայտարարել էր, որ նշված տեսանկարահանման սարքը տեսագրել է Երևան-Գյումրի ավտոճանապարհը և դրա հարևանությամբ գտնվող գազալցակայանը: Եվ 2014 թվականի նոյեմբերի 10-ին, ժամը 18.20 սահմաններում նշված տեսանկարահանման սարքը միացված է եղել և ֆիքսել է գազալցակայանի և ավտոճանապարհի մեքենաների երթևեկությունը: Սակայն քրեական գործում չկա տեսաձայնագրությունը, ինչպես նաև տեսաձայնագրությունը մասնագետի ներկայությամբ չի զննվել և փորձաքննություն չի կատարվել: Ակնհայտ է, որ տեսանկարահանման սարքը կամ տեսաձայնագրությունը միտումնավոր ոչնչացվել է քննիչի կողմից , որը հիմնական ապացույցն էր այն բանի, թե վթարի դեպքը ինչպես է տեղի ունեցել: Եթե տեսաձայնագրությունը լիներ, շատ հնարավոր է, որ այսօր քրեական գործը այլ լիներ: Ակնհայտ է, որ հետագա գործը կառուցվել է քննիչի կողմից գծագրված ելակետային տվյալների և միակողմանի փորձաքննությունների հիման վրա՝ ամբողջ մեղքը բարդելով միայն իմ պաշտպանյալ Մանվել Վարդանյանի վրա: Գործի նյութերին ծանոթանալուց հետո հարցրել եմ քննիչին, թե որտե՞ղ է տեսանկարահանման սարքը, քննիչը պատասխանեց, որ սարքը եղել է օն-լայն և ետ են վերադարձրել: Սակայն գործում չկան ապացույցներ սարքը ետ վերադարձնելու, օն-լայն լինելու վերաբերյալ: Նախաքննությունը տևել է 4 ամիսից ավել, և կարող էին աարքը ուղարկել փորձաքննության, որը չի արվել: Եվ դա հիմնականում կասկածի տեղիք է տվել, որ գործը տարվել է ոչ պատշաճ կերպով: Ես դիմել եմ գլխավոր դատախազին՝ փաստերը ստուգելու ու քրեական գործ հարուցելու պահանջով»:
Ըստ Լիանա Բալյանի, Մանվել Վարդանյանի վրա բարդված մեղքը ակնհայտ անհիմն է: «Ամբողջ մեղքը, որ բարդվեց Մանվել Վարդանյանի վրա, ակնհայտ անհիմն է, որովհետև մենք բոլորս էլ գիտենք, որ «Գազել»ի մեղքի առկայությունը անպայման 100 տոկոսով կա: Էստեղ ոչ միայն «Գազել»-ի մեղքի առկայությունը կա, այլ կա պետական մարմինների մեղքը: Քննչականը տարել է միակողմանի քննություն, ապացուցում է նաև այն, որ օրինակ՝ համապատասխան վթարի վայրում չեն եղել նշաններ, լուսավորված չի եղել, և փաստորեն քննչականը պետք է գործողություններ կատարելուց պարզեր, թե ինչո՞ւ պետական մարմինների անգործությունը հետևանքով նշանները կամ ստոպ նշանը եղել է ոչ համապատասխան վայրում, որովհետև, երբ որ ավտոմեքենաները Հոռոմի ճանապարհին կանգառ են անում ստոպ նշանի տակ, ձախից երևում է գազալցակայանը և Արթիկ տուֆերով բեռնված ավտոմեքենաներ, տեսադաշտը ճանապարհի ամբողջությամբ փակում են: Պետք է առաջ գնալ, որպեսզի ճանապարհը երևա: Այսինքն այս կապակցությամբ պետական մարմինների մեղքը նույնպես առկա է: «Գազել»-ի մեղքն էլ առկա է, ապացուցում է այն հանգամանքը, որ գազելը տեղափոխել է նախատեսվածից ավել ուղևորներ, արգելակային համակարգը գտնվել է ոչ սարքին վիճակում, անվադողերը եղել են մաշված և բնական է, որ գազելը շատ մեծ արագությամբ է եկել, բախվել «Կամազ»-ին, որը որ հնարավորություն ուներ արգելակելու իր մեքենան: Միգուցե «Կամազի»-ի փոխարեն ժայռաբեկորներ լցված լինեին ճանապարհին, մի՞թե հնարավորություն չպիտի ունենար արգելակելու մեքենան»:
Փաստաբանը նաև բողոքեց, որ այսօրվա դատական նիստից հետո վթարից զոհված Արամայիս Շիրազունու որդին՝ Գուրգենը, անպատվել է իրեն, սպառնացել, թե մենք դեռ չտեսնվենք: «Իրեն շատ վատ պահեց դատարանում, կարգադրիչները նրան դուրս հրավիրեցին», -ասաց փաստաբանը:
Կարդացեք նաև
Նշենք, որ դատական հաջորդ նիստը նշանակված է ապրիլի 29-ին, սակայն արդեն Գյումրիում:
Նունե ԱՐԵՎՇԱՏՅԱՆ
