Մարդու իրավունքների, ժողովրդավարության եւ Եվրոպայի խորհրդի 47 անդամ պետություններում օրենքի գերակայության ուսումնասիրության արդյունքում պարզ է դարձել, որ Եվրոպայի ժողովրդավարական թերությունները ավելի մեծ, խորը եւ աշխարհագրորեն ավելի տարածված են, քան նախկինում:
Եվրոպայի խորհրդի գլխավոր քարտուղար Թյորբորն Յագլանդն այսօր հրապարակած զեկույցում որպես ժողովրդավարական անվտանգության երկու ամենամեծ խնդիրներ առանձնացրել է շատ երկրներում դատարանների անկախության պակասը եւ խոսքի ազատության սպառնալիքները ամբողջ մայրցամաքում:
«Ազնիվ եւ արժանապատիվ դատարանները կարեւոր նշանակություն ունեն ժողովրդավարության աջակցության եւ կայունության պահպանման գործում, սակայն մեր անդամ երկրների ավելի քան մեկ երրորդը չեն կարողանում ապահովել իրենց իրավական համակարգերի անկախությունը եւ անկողմնակալությունը»,- ասել է գլխավոր քարտուղարը:
Յագլանդը նշել է, որ մամուլի ազատությունը ճնշման տակ է ամբողջ մայրցամաքում. «Լրագրողները ֆիզիկական սպառնալիքներ են ստանում շատ տեղերում, հակաահաբեկչական օրենքներն օգտագործվում են խոսքի ազատությունը սահմանափակելու համար եւ որոշ լրատվամիջոցներ, որոնք իշխանության ենթակայության տակ են անարդարացիորեն առավելություններ են ստանում»:
Կարդացեք նաև
Եվրոպայի խորհրդի գլխավոր քարտուղարի ակնարկը, որը հիմնված է Եվրոպայի խորհրդի դիտորդ մարմինների եզրակացությունների վրա, բացահայտում է ընտրությունների անցկացման թերությունները, խտրականության դեմ ուղղված օրենքների անբավարարությունը եւ շատ երկրներում հասարակական կազմակերպությունների վրա իրականացվող ճնշումները:
Որպես ռազմավարական հետազոտություն, զեկույցը ներառում է ժողովրդավարական անվտանգության տարբեր ասպեկտները գնահատելու մանրամասն չափանիշներ եւ հետագա աշխատանքի համար նախատեսված հատուկ ծրագրեր, այդ թվում՝ համաեվրոպական գործողությունների ծրագիր իրավական մասնագետների վերապատրաստման համար եւ նոր եռամյա ծրագիր ուղղված լրագրողների անվտանգությանը:
Պատրաստեց Աշոտ ԻՍՐԱԵԼՅԱՆԸ
