Երկրորդ ընթերցմամբ ԱԺ-ում քննարկվեց այսպես ասած «խոպանչիների մասին» օրինագիծը՝ Եկամտահարկի մասին եւ Շահութահարկի մասին օրենքներում փոփոխություններ եւ լրացումներ կատարելու մասին հարցը:
ՀԱԿ խմբակցության ղեկավար Լեւոն Զուրաբյանը խոսեց ոչ թե «Եկամտահարկի» մասին օրենքի փոփոխությունների, այլ՝ «Շահութահարկի» մասին:
Հիշեցնենք, որ կառավարությունը «Շահութահարկի մասին» օրենքի նոր փոփոխությամբ նախատեսում է, որ այն գործատուները, որոնք կունենան ծրագրեր արտերկրում շինարարական աշխատանքների կատարման եւ այդ ծրագրերը հավանության կարժանանան կառավարության կողմից, շահութահարկ կվճարեն 5 տոկոս:
Լեւոն Զուրաբյանը դիմեց կառավարությանը. «Երկու ամիս առաջ դուք բերել էիք այստեղ Շահութահարկի մասին օրենքում փոփոխություններ մտցնելու նախագիծը, ըստ որի, բոլոր այն ընկերությունները, որոնք ՀՀ-ում արտադրված ապրանքները արտահանում են 40 մլրդ-ի ծավալով, շահութահարկը 20 տոկոսից իջնում է 2 տոկոս: Այն ժամանակ ձեր միակ հիմնավորումն այն էր, որ մենք ուզում ենք խթանել տեղական արտադրությունը, տեղական արտահանումը: Էլի մենք չէինք ընդունում, բայց գոնե կար արդարացում: Հիմա ի՞նչ է եղել, կոնցեպցիան երկու ամսվա մեջ փոխվե՞լ է: Դուք էքսպերիմենտնե՞ր եք անում ժողովրդի վրա: 2 ամիս առաջ օրենք եք բերում, հետո պարզվում է, որ այն մարդիկ, որոնք պետք է 40 մլրդ-ի ծավալը հավաքեին, չեն կարողանում հավաքել, պետք է իրենց օգնել, որ հավաքեն: Սա երկքայլանի կոմբինացիա՞ էր միգուցե: Ի սկզբանե ունեցել եք սա, բայց հասարակական կարծիքը խաբելու, դիմադրությունը չեզոքացնելու համար սա սկզբում ներկայացրել եք որպես տեղական արտահանմանը նպաստող օրենք, որ հետո սա աննկատ անցնի հասարակության համար: Բայց մենք նկատել ենք: Իշխանությունները կոնցեպցիա՞ չունեն, թե՞ ժողովրդի վրա էքսպերիմենտներ են ուզում անել»:
Կարդացեք նաև
Ըստ Լեւոն Զուրաբյանի, այդ «ռեէքսպորտը» վատ է, որովհետեւ դա բոլորի համար չեն անում. «Դուք այդ հնարավորությունը բացում եք 1-2 օլիգարխների համար, ում հետ դուք նախապես պայմանավորվել եք: Ուրիշ տարբերակ հնարավոր չէ: Երբ ասում եք, որ կառավարությունը պետք է ծրագրին հավանություն տա, դրանով չարաշահումներ չեն լինի, թույլ տվեք դրան չհավատալ: Անգամ եթե մի րոպե պատկերացնենք, որ այս իշխանությունները կազմված են հրեշտակներից, դեմոկրատական աշխարհում միշտ ենթադրվում է, որ կառավարությունը կարող է գնալ չարաշահումների: Օրենքները այնպես են ստեղծվում, որ պետք է բացառել չարաշահումները: Իսկ դուք օլիգարխ տնտեսության սերտաճման օրինականացման օրինագիծ եք բերել»:
Լեւոն Զուրաբյանն ասաց, որ եթե նույնիսկ օրենքն ընդունվի, իրենք ամեն ինչ անելու են, որ կառավարության կողմից չարաշահումները բացահայտվեն:
ԱԺ փոխխոսնակ Էդուարդ Շարմազանովն արձագանքեց Լեւոն Զուրաբյանի՝ հրեշտակների կառավարություն արտահայտությանը՝ ասելով. «Երկրի վրա հրեշտակներ չկան, այս դահլիճում՝ եւս: Մենք բոլորս մեղավոր ենք: Բայց թող քար նետի մեր վրա նա, ով մեղք չի գործել»:
Իսկ ֆինանսների փոխնախարար Վախթանգ Միրումյանը պատասխանեց, որ ոչ փորձարկումներ են անում ժողովրդի վրա, ոչ էլ կոնցեպցիան են փոխել:
Հռիփսիմե ՋԵԲԵՋՅԱՆ
