Այսօր ԱԺ արտահերթ նիստում քվեարկության դրվեցին նախորդ քառօրյայում քննարկված մի շարք օրենսդրական նախաձեռնություններ:
ՀԱԿ խմբակցության պատգամավոր Գագիկ Ջհանգիրյանը հրատապ ռեժիմով քննարկվելիք Քրեական եւ Քրեական դատավարության օրենսգրքերում փոփոխությունների նախագծի հետ կապված դժգոհեց. «Մենք լուրջ առարկություններ ենք ներկայացրել, հեղինակը հետ է տարել: Խոշտանգման կոնվենցիայից բխող այս փոփոխությունները վիրաբուժական, վիրահատական միջամտություն են կատարում գործող քրեական օրենսգրքում: Այդ նախագիծը սկզբունքորեն անընդունելի է եղել հանձնաժողովի համար»:
Գալուստ Սահակյանն էլ պատասխանեց, որ արտահերթ նիստը հրավիրել է կառավարությունը եւ դա նրանց գործունեության շրջանակներում է:
Քվեարկության դրվեց ՀՀ նախագահի ներկայացրած՝ ատոմակայանի 2-րդ էներգաբլոկի շահագործման ժամկետի երկարացման մասին համաձայնագիրը եւ ընդունվեց 111 կողմ, 1 դեմ եւ 3 ձեռնպահ ձայների հարաբերակցությամբ:
Կարդացեք նաև
114 կողմ, 2 ձեռնպահ ձայներով էլ ընդունվեց ատոմակայանի շահագործման համար 270 մլն դոլարի վարկ վերցնելու համաձայնագիրը:
«Անձնական տվյալների պաշտպանության մասին» օրենքի փոփոխություններն էլ ընդունվեցին 74 կողմ, դեմ 20, ձեռնպահ 21 քվեարկության արդյունքներով:
Այս պահին առաջին ընթերցմամբ քննարկվում է կառավարության կողմից ներկայացված «Եկամտային հարկի» մասին եւ «Շահութահարկի մասին» ՀՀ օրենքներում փոփոխություններ եւ լրացումներ կատարելու մասին նախագիծը:
Ֆինանսների փոխնախարար Վախթանգ Միրումյանն ասաց, որ Եկամտահարկի մասին օրենքի փոփոխությամբ առաջարկվում է 13 տոկոս հարկային դրույքաչափ սահմանել այն վարձու աշխատողների համար, որոնք գործատուների հետ կնքված աշխատանքային պայմանագրով աշխատանքներ են կատարում ՀՀ տարածքից դուրս եւ այդ աշխատանքները վերաբերում են շինարարական, շինմոնտաժային աշխատանքներին:
Սրանով կառավարությունն ուզում է, որ արտերկրում աշխատողներն էլ ՀՀ-ում օրինական ձեւակերպում ստանան եւ պետբյուջե վճարվի եկամտահարկ: Շահութահարկի մասին ՀՀ օրենքի փոփոխությամբ էլ նախատեսվում է, որ այն գործատուները, որոնք կունենան ծրագրեր արտերկրում շինարարական աշխատանքների կատարման եւ այդ ծրագրերը հավանության կարժանանան կառավարության կողմից, շահութահարկ կվճարեն 5 տոկոս:
ՀԱԿ խմբակցության պատգամավոր Հրանտ Բագրատյանը զարմացավ. «Լրջագույն օրենք ենք քննարկում՝ թեթեւամիտ ձեւով: Օրենքը որեւէ քննադատության չի դիմանում: Ռուսաստանին հարցրե՞լ եք, որ սենց օրենք եք ընդունում: Բա որ այստեղ նստածներից մեկը վերցնի ու Պուտինին նամակ գրի: Ես հոգնել եմ այդ արտասահմանյան հայ օլիգարխներից: Դրանք այս պետությունը մի օր կքանդեն: Առաջին անգամ եմ տեսնում, որ շահութահարկը եւ եկամտահարկը դիֆերենցեն՝ ըստ աշխատանքների»:
Հռիփսիմե ՋԵԲԵՋՅԱՆ
