Խաղաղ պայմաններում զոհված զինծառայողների սևազգեստ մայրերն այսօր կրկին հավաքվել են նախագահական նստավայրի առաջ: Ոստիկանները նրանց կրկին արգելում են մոտենալ նախագահականին, պատճառաբանելով, թե հավաքների մասին օրենքի համաձայն՝ իրենք իրավունք չունեն այնտեղ ակցիա անել:
Բայց կանայք հայտարարում են, թե ուղղակի ուզում են քայլել:
Ժամանեց մարդու իրավունքների պաշտպանի գրասենյակի աշխատակիցը, նա նշեց, թե իրավունք ունեն թե քայլել թե ակցիա իրականացնել, եթե չեն խոչընդոտում նախագահականի բնականոն աշխատանքը:
Իրավիճակը դուրս եկավ կառավարելիության սահմաններից, բախում տեղի ունեցավ կանանց և ոստիկանների միջև: Մայրերը փորձեցին փողոցի երթևեկելի հատվածով իջնել նախագահի նստավայրի դիմաց, Վարդգես Գասպարին պառկեց փողոցում: Ոստիկանները կանանց մի պահ թույլ տվեցին կանգնել նախագահականի առաջ, այնուհետև հրելով, շղթա կազմելով՝ հեռացրին: Կանայք ստիպված անցան դիմացի մայթ:
Կարդացեք նաև
Ոստիկանները կրկին խոչընդոտեցին կանանց, հրելով հեռացնում էին, թե մայթի ծաղիկներն են պոկում: Կանայք էլ վրդովված էին, թե «մեր ծառը քոքահան եք արել, ձեր ծաղիկների մասին եք մտածում»: Ծաղիկները պոկեցին ու շպրտեցին դեպի նախագահական՝ ասելով. «Իմ ծաղիկը հողի տակն է, էդ ծաղիկները Սերժ Սարգսյանի վրա դրվի»:
Բախում տեղի ունեցավ սպանված զինվորի հոր և ոստիկանների միջև:
Մայրերը դժգոհ են մարդու իրավունքների պաշտպանի գրասենյակի աշխատանքից: Մայրերն այժմ շարժվում են դեպի ՄԻՊ գրասենյակ՝ ակցիա անելու:
Տաթև ՀԱՐՈՒԹՅՈՒՆՅԱՆ
