Թուրքիայում քուրդ պատգամավորների ճնշող մեծամասնությունը ընտրվել է արեւելյան եւ հարավ-արեւելյան շրջաններից: Այս մասին հունիսի 16-ին «Մեդիա կենտրոնում» լրագրողների հետ հանդիպման ընթացքում, անդրադառնալով հունիսի 7-ին Թուրքիայում տեղի ունեցած խորհրդարանական ընտրություններին, ասաց լրագրող Մարկ Գրիգորյանը:
Նա նկատեց, որ նախորդ ընտրությունների ժամանակ արեւելյան եւ հարավ-արեւելյան շրջաններից եւս մեծ մասամբ ընտրվում էին քուրդ պատգամավորներ. «Բայց այդ նախորդ ընտրությունների ժամանակ նրանք, որպես կանոն, կա՛մ իշխող կուսակցության անդամներ էին, կա՛մ գնում էին պառլամենտ որպես անկախ պատգամավորներ: Այսինքն՝ չկար այն կուսակցական միավորումը, որը կա հիմա, անցյալում դա բնականոն էթնիկ միավորում էր, որովհետեւ նրանք էթնիկ քուրդ էին, այդ հարցը լուծվում էր: Հիմա գոյություն ունի կուսակցություն, որը պաշտպանում է ոչ միայն քրդերին, այլեւ ձախակողմյան կուսակցություն է»:
Մարկ Գրիգորյանն ասաց՝ երբ որ ստեղծվեց Քրդական ժողովուրդների դեմոկրատական կուսակցությունը, պարզ էր, որ այն անպայման հաջողության է հասնելու արեւելյան շրջաններում. «Այստեղ կարեւոր է նաեւ այն, որ նրանց օգտին քվեարկում էին նաեւ մարդիկ երկրի արեւմտյան շրջաններից: Այսինքն՝ դառնալով կուսակցություն, ճիշտ ձեւակերպելով կուսակցությունը, չպահելով կուսակցությունը էթնիկ սահմաններում, իրենք հասան ավելի մեծ հաջողության, որովհետեւ իրենց կողմ բերեցին նաեւ այլ ազգային փոքրամասնությունների եւ այլ փոքրամասնությունների ընդհանրապես»:
Նա հավելեց, որ իրեն հետաքրքրում էր, թե ընտրությունների արդյունքները ինչպես են լուսաբանում թուրքական հեռուստաընկերությունները. «Պետք է ասեմ, որ բարձր մակարդակով էին լուսաբանում»:
Կարդացեք նաև
Ամի ՉԻՉԱԿՅԱՆ
