Այսօր Շիրակի մարզի ընդհանուր իրավասության դատարանում Արթիկի դատախազ Արտյոմ Ավետիսյանը ընթերցեց Հոռոմի խաչմերուկում տեղի ունեցած ողբերգական վթարի պատճառով տուժող ու տուժողի իրավահաջորդ ճանաչված անձանցից մի քանիսի նախաքննական ցուցմունքները:
Հիշեցնենք, որ Երևանից Գյումրի վերադարձող «Տրանս ակնթարթ» ընկերության «Գազել 32» մակնիշի ու Մանվել Վարդանյանի վարած «Կամազ» մակնիշի ավտոմեքենաների բախման հետևանքով «Գազելը» այրվել էր, 7 ուղեւորներ տեղում մահացել էին, նրանց մի քանիսը այրվել էին՝ դառնալով անճանաչելի:
Կարեն Հարությունյանը իր ցուցմունքում գրում է, որ վթարի մասին տեղեկացել է հեռուստատեսությունից, իսկ դիահերձարանում իր որդու՝ Դավիթ Հարությունյանի դին ճանաչել է նրա մոտ եղած բանալիով: Դավիթը ընդամենը 21 տարեկան էր:
Մարինե Նազարեթյանի ամուսինն էլ իր ցուցմունքում գրել էր, որ կնոջը ճանաչել է նրա հագած կոշիկներով:
Կարդացեք նաև
Վթարից մահացած ծանրամարտի չեմպիոն Վանիկ Սարգսյանի հայրն էլ՝ Լեւոն Սարգսյանը, իր նախաքննական ցուցմունքում հայտնել էր, որ ինքը վթարի ժամանակ Հայաստանում չի եղել: Իր որդին նստած լինելով «Գազելի» առաջնամասում՝ վթարի ժամանակ հարվածից դուրս է ընկել մեքենայից ու ստացած մարմնական վնասվածքների պատճառով մահացել է: Նրա դին դիահերձարանում ճանաչել է կնոջ հորեղբոր որդին: Ի դեպ, Լեւոն Սարգսյանը իր լրացուցիչ ցուցմունքում հայտնում է, որ «Կամազի» վարորդի դեմ բողոք չի ներկայացնում:
Ողբերգական վթարի մասին ցուցմունք տվեց նաեւ փրկարարական ծառայության աշխատակից Ռաֆայել Հովհաննիսյանը, որը նույնպես եղել է «Գազելի» մեջ, չի վնասվել, սակայն ականատեսն է եղել դաժան տեսարանի:
Նունե ԱՐԵՎՇԱՏՅԱՆ
