Ազատության հրապարակում շարունակվում է «Ոչ թալանին» նախաձեռնության նստացույցը:
Նախաձեռնության անդամ Վաղինակ Շուշանյանը Aravot.am-ին հայտնեց, որ գիշերը շատ խաղաղ է անցել. «Մոտավորապես առավոտյան մինչեւ 6:00-6:30-ի սահմաններում մոտ երեք հարյուր-երեք հարյուր տաս մարդ է եղել նստացույցին: Մի մասը 6:30-ի սահմաններում գնացին տուն հանգստանալու, փոխվելու, որպեսզի վերադառնան եւ այսօր շարունակեն նստացույցը: Մյուս մասն այսօր գնաց իրազեկման Մալաթիա-Սեբաստիա եւ Շենգավիթ վարչական շրջաններում՝ հայտարարելու, որ նստացույց կա, շարունակվելու է մինչեւ երկուշաբթի եւ եւս մեկ անգամ հիշեցնելու պահանջը, որ պետք է չեղարկվի Հանրային ծառայությունները կարգավորող հանձնաժողովի հունիսի 17-ի որոշումը եւ վերանայվի նվազեցման նպատակով»:
Վաղինակ Շուշանյանն ասաց, որ իրազեկումը մի քանի խումբ է կատարում՝ մի մասը կանգառներում են իրազեկում մարդկանց, մյուս մասը՝ բակերում, իսկ «Բարձր լարում» գրությամբ պաստառով խումբը Հյուսիսային պողոտայում է շրջում: Նա հավելեց, որ ամբողջ գիշերվա ընթացքում սադրանքներ չեն եղել, ոստիկանության կողմից խոչընդոտներ չեն եղել, ոստիկանների մի խումբ վերահսկել է իրենց անվտանգությունը:
Aravot.am-ի հարցին, թե նստացույցին չմասնակցող քաղաքացիներն իրենց օգնություն ցուցաբերե՞լ են, նա պատասխանեց՝ այո՛. «Ես դրանից անգամ ոգեւորվում եմ: Այն մարդիկ, որոնք ֆիզիկապես չեն կարողանում մասնակցել նստացույցին, իրենց աջակցությունը ցուցաբերում են, օրինակ՝ գլխարկներ են բերում, անձրեւանոցներ են բերում, սառույց են բերում, ջուր են բերում, սուրճ են բերում, մարդիկ ուտելիք էլ են անգամ բերում: Երեկ՝ հանրային քննարկման ժամանակ, մեծամասնության կողմից որոշվեց, որ կարելի է հանգանակության արկղ ստեղծել, որտեղ սննդի կամ այլ կարիքների համար միջոցներ ունենանք: Մարդիկ երեկ էլ, այսօր էլ տեսնելով այդ հանգանակության արկղը իրենց օժանդակությունն են ցուցաբերել: Դա երեւս օգուտ է, բացի զուտ մասնակցությունից»:
Կարդացեք նաև
«Ոչ թալանին» նախաձեռնությունը հունիսի 19-ին նստացույց էր հայտարարել մինչեւ երկուշաբթի՝ հունիսի 22-ը ժամը 19-ը: Նրանք պահանջում են էլեկտրաէներգիայի սակագնի բարձրացման որոշումը կասեցնել, հակառակ դեպքում՝ նստացույցի ավարտից հետո կշարժվեն նախագահական նստավայր:
Ամի ՉԻՉԱԿՅԱՆ
Ես շատ հպարտ եմ նստացույցի բոլոր մասնակիցներով: Ամբողջ ազգը (աշխարհի 4 կողմից) ձեզ հետևում է և ձեր կողքին է:
Որտեղ պայքար, այնտեղ մի՛շտ արդյունք: Կաթիլ-կաթիլ ջուրը քար է ծակում: