«Ցեղակրոն» կուսակցության նախագահ Շանթ Հարությունյանի որդին՝ Շահեն Հարությունյանը վստահեցնում է, որ երեկ Հայաստան – Դանիա ֆուտբոլային հանդիպման ժամանակ ոչ մի ակցիա չէր նախատեսել, պարզապես գնացել էր ֆուտբոլ դիտելու:
Հիշեցնենք, որ Վազգեն Սարգսյանի անվան հանրապետական մարզադաշտում երեկ Հայաստան – Դանիա ֆուտբոլային հանդիպման ժամանակ ոստիկաններն ու մարզադաշտի անվտանգության աշխատակիցները բռնություններ են կիրառել, արդյունքում Շահեն Հարությունյանը ոտքի թաթի սալջարդով տեղափոխվել էր հիվանդանոց:
Շահեն Հարությունյանը Aravot.am-ին պատմեց, որ երկրորդ խաղակեսից առաջ՝ ընդմիջման ժամանակ, երբ ինքն ու ընկերները գնացին հյութ գնելու, իրենց մոտեցան ոստիկաններ, մարզադաշտի անվտանգության աշխատակիցներ ու քաղաքացիական հագուստով ոստիկաններ՝ եռագույնով ներկված ու ասացին, որ այդ մասից չի կարող ոչինչ գնել, հետո արդեն իրեն պահեցին իրենց ուշադրության տակ. «Մարզադաշտում իմ տեղը, որտեղ պետք է նստեի, չէին թողնում նայեի, անընդհատ իմ դիմացը փակում էին, այնպես էին անում, որ չկարողանամ նայել, վազվզել եմ այս կողմ այն կողմ, որ ազատվեմ նրանց հսկողությունից, հետո գնացի ոչ իմ համար նախատեսված վայրում նստեցի, մոտեցան, հարցրին՝ տոմս ունե՞մ, ցույց տվեցի տոմսս, ասացին՝ դե արի գնանք քո տեղը նստիր: Հենց հասանք աստիճանների մոտ, մտան թեւերս ու զոռով քաշքշեցին, հետո հավավքվեցին մի քսան հոգով, ձեռքերիցս բռնեցին ու շպրտեցին դուրս»:
Հիշեցնենք, որ հունիսի 13-ին Հայաստան-Պորտուգալիա հանդիպման ընթացքում Շահենը ակցիա էր անցկացնել՝ մտնելով տրիբունա՝ քաղբանտարկյալների լուսանկարներով պաստառները վերեւ պարզած:
Կարդացեք նաև
Արփինե ՍԻՄՈՆՅԱՆ
Լուսանկարը՝ Շահեն Հարությունյանի ֆեյսբուքյան էջից
