Նորագույն տեխնոլոգիաները մեզ ստիպում են անընդհատ նոր գիտելիք յուրացնել եւ տիրապետել նոր հմտությունների: Դրանց կիրառմամբ ուսումնական գործընթացն ավելի տեսանելի է դառնում և արդյունավետ` հետազոտությունների ժամանակ:
Թվային տեխնոլոգիաների կիրառումը որակապես փոխում է նաև ուսուցչի կամ դասախոսի աշխատանքը` երկար դասախոսություններին փոխարինում են նոր մեթոդներն ու ձևերը:
Գիտելիքի ստուգման եւ գնահատման համար էլ կարելի է օգտագործել հատուկ համակարգչային ծրագրեր: «Այբ» դպրոցն այն եզակի կառույցն է, որտեղ այսօր արդեն` խոսում են ապագայի մասին:
«Այբ» դպրոցի տնօրեն Արամ Փախչանյանի խոսքով՝ տեխնոլոգիաների ճիշտ կիրառումը կարեւոր և պարտադիր է ժամանակակից դպրոցում: Հենց այդ պատճառով էլ «Այբ» դպրոցում իրականացնում են ֆաբլաբ նախագիծը:
Ֆաբլաբ նախագծի իրականացման աշխատանքները Հայաստանում սկսվեցին 2013 թվականին, երբ «Այբ»-ն սկսեց համագործակցել ԱՄՆ-ի Մասաչուսեթսի տեխնոլոգիական ինստիտուտի հետ:
Ֆաբլաբը նորարարական «խելացի» լաբորատորիաների ներդրման բացառիկ ծրագիր է: Արհեստանոց-լաբորատորիա` զինված հատուկ սարքավորումներով և նյութերով, որը սովորողին տեսական գիտելիքը գործնականում կիրառելու լայն հնարավորություն է տալիս:
«Ֆաբլաբը մշակվել է կրթական նպատակներով, որ պատանիներն իրենց գիտելիքները օգտագործեն մի բան սարքելու գործում»,-ասում է Արամ Փախչանյանը:
Նոր տեխնոլոգիաների կիրառմամբ աշակերտները ստեղծում են «գրեթե ամեն ինչի» ձևանմուշը և տիրապետում բիզնես հմտություններին:
Ֆաբլաբեր գործում են աշխարհի ավելի քան 34 երկրում՝ հիմնականում կրթական հաստատություններին կից: Միանալով Ֆաբլաբ ցանցին՝ Հայաստանը դառնում է Մասաչուսեթսի տեխնոլոգիական ինստիտուտի՝ աշխարհի լավագույն տեխնիկական բուհի հսկա ցանցի անդամ և հնարավորություն է ստանում օգտվելու այն հմտություններից, գիտելիքից և փորձից, որոնք ստեղծվել են ցանցի անդամ լաբորատորիաներում:
«Այբ»-ի և Մասաչուսեթսի տեխնոլոգիական ինստիտուտի մասնագետները մանրակրկիտ ուսումնասիրել են ֆաբլաբի սարքավորումների ցանկը, և Հայաստանում դրանց օգտագործման արդյունավետությունը, ինչից հետո`«Այբ»-ը ձեռք է բերել ֆաբլաբի սարքավորումների լիակատար փաթեթը:
Այսպիսով՝ այս արհեստանոց լաբորատորիաներում յուրաքանչյուրը ներկայացնում է իր փորձն ու սովորում՝ սովորեցնելով:
«Այբ» դպրոցի տնօրենի պնդմամբ իրենց նպատակն այն է, որ աշակերտները կարողանան այդ տարածքում հետաքրքիր, ֆանտաստիկ, յուրօրինակ ինչ որ բաներ մտածել, մոգոնել, ստեղծել, կառուցել եւ դրա մասին լուր տարածել աշխարհով մեկ:
Ֆաբլաբի պաշտոնական բացումը տեղի կունենա հոկտեմբերի առաջին օրերին:
Անժելա ՇԱՀՈՒՄՅԱՆ
Լուսանկարը՝ Արամ Փախչանյանի ֆեյսբուքյան էջից