Սեպտեմբերի 15-ին ՀՀ վարչական դատարանում տեղի ունեցավ «Ինֆորմացիայի ազատության կենտրոնն» ընդդեմ ՀՀ ոստիկանության Ճանապարհային ոստիկանություն ծառայության դատական գործով առաջին դատական նիստը:
Ինֆորմացիայի ազատության կենտրոնի տեղեկացմամբ, հայցապահանջը հետեւյալն է. դատարանից խնդրել են ոչ իրավաչափ ճանաչել ՃՈ այն անգործությունը, որով «Տեղեկատվության ազատության մասին» ՀՀ օրենքով սահմանված ժամկետում պատասխան չի տրվել ԻԱԿ-ի կողմից հարցմամբ խնդրվող տեղեկատվության վերաբերյալ:
Երեկ ՃՈ ներկայացուցիչը առարկել է հայցի դեմ` նշելով, որ անհայտ է, թե ՃՈ-ն երբ է փաստացի ստացել հարցումը, ուստի հնարավոր չէ պարզել՝ արդյոք ժամկետների խախտում եղե՞լ է, թե՞ ոչ: ԻԱԿ-ի ներկայացուցիչը դատարանին ներկայացրեց «ՀայՓոստ» ՓԲԸ-ից ստացված գրությունը, որով ապացուցվում է, որ ՃՈ-ն ԻԱԿ-ի հարցումը ստացել է 2015թ. մայիսի 25-ին, այնինչ պատասխանն ուղարկել է մեկ ամիս անց (ՃՈ-ի պատասխանը թվագրված է 2015թ. հունիսի 24)` խախտելով օրենքով սահմանված ժամկետները:
Դատարանը եւս մի նախնական դատական նիստ նշանակեց` ՃՈ-ից պատասխան գրության վերաբերյալ տեղեկություններ ստանալու, իսկ ԻԱԿ-ից ՃՈ-ի պատասխան գրության ծրարի բնօրինակը ստանալու համար:
Սեփ. լր.
«Առավոտ» օրաթերթ
17.09..2015
