Մարդու իրավունքների եվրոպական դատարանը (ՄԻԵԴ) 2008 թ. մարտի 1-ի 9 զոհերի ընտանիքների ներկայացրած բողոքների հիման վրա սեպտեմբերի 1-ին վարույթ է ընդունել «Վաչագան Ֆարմանյան և մյուսներ ընդդեմ Հայաստանի Հանրապետության» գործը։ Բոլոր հայցվորներին ՄԻԵԴ-ում ներկայացնում է փաստաբան Վահե Գրիգորյանը: Այս մասին տեղեկանում ենք ՄԻԵԴ կայքից:
ՄԻԵԴ ներկայացված բողոքի «Հարցեր» բաժնից տեղեկանում ենք, որ մասնավորապես քննության առարկա է դառնալու, թե արդյո՞ք հայցվորների կյանքի իրավունքը, որը ամրագրված է Մարդու իրավունքների եվրոպական կոնվենցիայի 2-րդ հոդվածում, խախտվել է անհամաչափ ուժի կիրառման հետեւանքով:
Քննության առարկա է լինելու նաեւ Հայաստանի կողմից կոնվենցիայի 13-րդ հոդվածի (իրավական պաշտպանության արդյունավետ միջոցի իրավունք) խախտումը: Տուժողների իրավահաջորդները պնդում են, որ ՀՀ իշխանություններն իրենց հարազատների գործով արդյունավետ քննություն չեն անցկացրել եւ արդյունավետ փոխհատուցում չեն տրամադրել:
Նշված է նաեւ, որ ՄԻԵԴ-ը Հայաստանի իշխանություններից արդեն տեղեկատվություն է պահանջել գործի քննության ընթացքի, ինչպես նաեւ խորհրդարանական փաստահավաք խմբի բացահայտումների մասին:
Կարդացեք նաև
Պատրաստեց Աշոտ ԻՍՐԱԵԼՅԱՆԸ
