2013 թվականի դեկտեմբերի երկուսին ընդդեմ Մաքսային միության կազմակերպված բողոքի ակցիայի գործով Վարչական դատարանում դեռ քննվում է վարչական պատասխանատվության ենթարկելու պահանջով ոստիկանությունն ընդդեմ քաղաքացիական ակտիվիստ Դանիել Իոաննիսյանի գործը:
Այսօր հերթական դատական նիստին Դանիել Իոաննիսյանը չէր ներկայացել, ասաց՝ ծանուցագիր չի ստացել: Այս գործը ակտիվիստը համարում է աբսուրդների շարքից:
«Ես առաջինն էի այդ օրը, որ ինձ բերման ենթարկեցին: Բերման ենթարկեցին, երբ բանակցում էի Վալերի Օսիպյանի հետ: Ոստիկանությունը դատարանում մինչ օրս ոչ կարողանում է ասել, թե որն է եղել այն պահանջը, մի կողմ դրած օրինական-չօրինական, որ չեմ կատարել: Ոստիկանությունն է օրենք խախտել, որովհետեւ մենք իրազեկված երթ էինք իրականացնում: Այս գործը խեղկատակություն է»,- ասաց ակտիվիստը:
Նա չի հասկանում ոստիկանության ներկայացուցիչների պնդումները, թե այդ օրվա ակցիայի բոլոր նկարահանումները ջնջվել են. «Ասում են, բոլոր նկարահանումները ջնջել են, որովհետեւ այդ տեսանկարահանումներում որեւէ մեկի կողմից իրավախախտում չի արձանագրվել: Այսինքն, ես իրավախախտում չեմ գործել, իրենք են փաստում, որ իրավախախտում չի արձանագրվել, դրա համար են տեսանյութերը ջնջել, բայց հակառակ կողմից ասում են՝ չէ իրավախախտում ես գործել, պետք է հիսուն հազար դրամ վճարես, ո՞նց հասկանանք այս հակասությունը: Սա պարտված գործ է»:
Կարդացեք նաև
Արփինե ՍԻՄՈՆՅԱՆ
