Ինչպես տեղեկացրել ենք , Շիրակի թեմի Սուրբ Յոթ Վերք Եկեղեցու «Բարեգործական ջոկատ»-ի երիտասարդներն արդեն երրորդ տարին է՝ իրականացնում են «Մեկ բացիկ, մեկ բնակարան» ծրագիրը: Այսինքն` բացիկներ են վաճառում խորհրդանշական գումարով՝ մի հատը 400 դրամով՝ Գյումրիի անօթեւան մեկ ընտանիքի երկու սենյականոց բնակարան գնելու նպատակով: Նրանք նախորդ տարիներին արդեն երկու բնակարան գնել են ծայրահեղ վիճակում գտնվող երկու ընտանիքների համար:
Քիչ առաջ երիտասարդների այս ակցիային միացավ ՀՀ կրթության ու գիտության նախարար Արմեն Աշոտյանը: Վերջինս 25 բացիկ գնեց: Հարցին, թե որտեղի՞ց էր տեղեկացել նախարարը այս ծրագիր մասին՝ ԶԼՄ-ների՞ց, թե սոցիալական ցանցերի՞ց, որտեղ չափազանց ակտիվ է նա, նախարարի մամլո խոսնակ Զոհրապ Եգանյանն Aravot.am-ին ասաց, որ վերջերս Արմեն Աշոտյանի մոտ հյուրընկալվել էին գյումրեցի աշակերտներ ու երիտասարդներ, որոնք եւ տեղեկացրել են նրան բարեգործական այս ծրագրի մասին: Արմեն Աշոտյանն էլ արձագանքել է ՝ իր լուման ունենալով գյումրեցի մեկ ընտանիքի տնակից փրկելու գործում:
Նունե ԱՐԵՎՇԱՏՅԱՆ
