Aravot.am-ի հետ զրույցում Արթիկն ու Անիի տարածաշրջանն ընդգրկող թիվ 36 ընտրատարածքից մեծամասնական կարգով ընտրված պատգամավոր, նախկին ԲՀԿ-ական Մուշեղ Պետոյանը վստահեցրեց, որ իր տարածաշրջանում հաղթելու է «Այո»-ն: Մեր դիտարկմանը, թե «Ժողովրդավարական հայրենիք» կուսակցության նախագահ Պետրոս Մակեյանը, երեկ շրջելով Արթիկում ու հարակից գյուղերում, փաստեց, որ այս տարածքի բնակիչները չեն ազդվում անգամ իրենց ներկայությունից ու էթիկայի բոլոր նորմերն անցնելով՝ հայհոյում են իշխանություններին, Մուշեղ Պետոյանն ասաց. «Ես չգիտեմ Պետրոս Մակեյանը ի՞նչ է հայտարարում մեր ժողովրդի կարծիքների հետ կապված, բայց նմանատիպ բան չկա: Մակեյան Պետրոսը եկել է, Արթիկի հրապարակում եղել են առնվազն տաս տարեց մարդիկ, էդ տաս հոգու հետ զրուցելով՝ չի կարելի ընդհանրացնել, էլի, որպես ժողովրդի կարծիք ներկայացնել: Ժողովուրդը շատ էլ լավ տրամադրված է»:
Ճշտող հարցին՝ ինչի՞ն է լավ տրամադրված, «Այո» քվեարկելո՞ւն, մեր զրուցակիցն ասաց. «Այո, սպասում են փոփոխությունների. մտածում են, որ յուրաքանչյուր փոփոխություն իր հետ մի լավ բան կբերի, էդ կարգի է, մեր ժողովուրդը ո՛չ հայհոյում, ո՛չ էլ բան է անում իշխանություններին, թող ապատեղեկատվություն չտրամադրեն»: Հարցին՝ Արթիկն էլ սոցիալապես վատ վիճակում է, այստեղից էլ քիչ չեն արտագաղթողներն ու արտագնա աշխատանքի մեկնողները՝ մի՞թե սա պատճառ չէ, որ արթիկցիները իշխանության նախաձեռնությունները չընդունեն, միանգամից «Ոչ» ասեն, պատգամավորն ասաց. «Այ, պիտի տարբերենք արտագաղթողներ ու արտագնա աշխատանքի մեկնողներ. շատ շուտ՝ Սովետական Միության ժամանակաշրջանում էլ մեր տարածաշրջանից արտագնա աշխատանքի գնացողների քանակը մի քիչ շատ էր, դեռ էն ժամանակվանից: Եւ ի տարբերություն բոլորի, մերոնք միշտ էլ գնացել, աշխատել, հետ են վերադարձել ու այս պահին արտագաղթ՝ որպես այդպիսին, որ ասեմ շատ է, էդպիսի բան չկա կոնկրետ Արթիկի տարածքում: Ինչքան որ ես տեղյակ եմ, ինչքան որ ուսումնասիրել եմ, ինչքան որ ենթաշտաբները գործում են, բացակաների թիվը 20 տոկոս է կազմում մեր տարածքում: Պատկերացնո՞ւմ եք ընդմիշտ բացակայողների թիվը»:
Ամեն դեպքում աշխատանք ունեցողների թիվը մեծ չէ Արթիկում, մեր դիտարկմանն ի պատասխան՝ Մուշեղ Պետոյանն ասաց. «Իհարկե, շատերը կան, որ աշխատանք չունեն, ինչպես հանրապետության բոլոր տարածքներում, այնպես էլ մեր մոտ, բայց մեր մոտ, ասում եմ էլի Սովետական Միության ժամանակվանից արտագնա աշխատանքի գնացողների թիվը շատ բարձր է եղել եւ հիմա էլ էդ նույն ձեւի պահպանվում է: Իսկ քանի որ դեկտեմբերի 6-ին է հայտարարված հանրաքվեի օրը, այդ ժամանակ, բնականաբար, շատ մարդիկ կգան այստեղ, ովքեր, որ բացակա են, կգան, կշատանան»:
Այսինքն կվերադառնան Արթիկ քվեարկության մասնակցելո՞ւ համար, Մուշեղ Պետոյանն ասաց. «Չէ, պարտադիր չէ քվեարկության համար գան, պարզապես արտագնա աշխատանքը սեզոնային բնույթ ունի, չէ՞, այն ժամանակահատվածն է, որ հետ են վերադառնում: Ես քաղաքի մեջ, ժողովրդի մեջ անընդհատ քայլում եմ, տեսնում եմ՝ շարժը սկսվում է, այսինքն՝ խոպանից կեսն արդեն հետ է վերադարձել, ակնհայտ երեւում է էլի»: Մեր հարցադրմանը՝ չասացիք ի վերջո աղքատությունը, գործազրկությունը լուրջ պատճառ չե՞ն, որ արթիկցիները կտրուկ դեմ լինեն սահմանադրական փոփոխությանը. հենց Արթիկի շատ գյուղերում պատճառաբանում են՝ բարի լինեն գործող Սահմանադրությամբ մեր լավ կյանքն ապահովեն, պատգամավորը շարունակեց. «Չգիտեմ դուք Արթիկին ինչքանով եք ծանոթ, Արթիկի ժողովուրդը բարձր ինտելեկտով ժողովուրդ է, պարզ հասկանում են, գիտակցում են, որ հանրաքվեով չէ, որ պիտի աշխատատեղ ավելանա կամ պակասի, հանրաքվեի փոփոխությունը դրա հետ ոչ մի կապ չունի: Եթե ուշադիր լինեք, Երեւանի բուհերում արթիկցի ուսանողների տոկոսային հարաբերությանը, վերջին 20 տարվա ընթացքում ինչ կարգի է…Մեր ժողովուրդը մի քիչ ավելի շատ կրթված է, իհարկե, ես մեր ժողովրդին գովեստի խոսքեր եմ ասում ու պարտավոր եմ ասելու ու իրականում այդպես է: Մեր ժողովուրդը ե՛ւ քաղաքականացված, ե՛ւ բարձր ինտելեկտ ունի, ե՛ւ ուսումնասիրում է, էս հանրաքվեի բրոշյուրները, պաշտոնական տեղեկագիրը, որ բաժանվել են, էնպես խլեցին իրար ձեռքից ու ուսումնասիրեց մեր ժողովուրդը: Իրենք պարզ հասկանում են, որ հանրաքվեն որեւէ կապ չունի աշխատատեղ ստեղծելու հետ, իրենք բոլորը գիտակցում են»:
Կարդացեք նաև
Այսինքն այդքան գո՞հ են ամեն ինչից, չկա՞ ընդդիմադիր տրամադրություն, մեր դիտարկմանն ի պատասխան՝ պարոն Պետոյանն ասաց. «Իհարկե, դժգոհ է ժողովուրդը, որ աշխատատեղ չկա, սոցիալական վիճակը բարվոք չէ, բայց հանրաքվեն դրա հետ ի՞նչ կապ ունի, իրենք պարզ հասկանում են, որ դրա հետ ոչ մի կապ չունի»: Հարցին՝ կարծում եք, որ «Այո»-ն կհաղթի՞ Արթիկի տարածաշրջանում, պատգամավորն ասաց. «Իհարկե, միանշանակ, հետո մեր ժողովուրդը գիտակցաբար է մոտենում այդ ամեն ինչին, հասկանում է, որ յուրաքանչյուր փոփոխություն իր հետ մի լավ, դրական բան կբերի, էլի: Նոր առաջընթաց է, մի քայլ առաջ է ու շատ լավ տրամադրված է մեր ժողովուրդն, ասեմ: Եւ հետո էն ժամանակվա քաղաքականացված Արթիկը էս պահին էլ չկա, դա էլ ասեմ, որովհետեւ ժողովուրդը տեսավ, որ քաղաքականությամբ շատ զբաղվելով ոչ մի բան չի փոխվել: Ասում եմ իրականությունը. ժողովուրդը, տեսնելով քարոզիչների՝ «Նոր Հայաստան»-ի գալ-գնալը, հետո տեսնելով իրենց պասիվությունը, ոնց որ թե կտրուկ փոխվել են. էն առաջվա քաղաքականացված Արթիկը չէ էս պահին: Ակտիվություն չկա, հիասթափված են էդ կարգի բաներից՝ ընդդիմադիր, միտինգներ, կուսակցություններ, բան… Կուսակցություններում էլ էդպիսի ակտիվություն չեմ տեսնում, բայց հանրաքվեի հետ կապված, որ դրական սպասում ունեն, նոր ակնկալիք, էդ փաստ է»:
Պատգամավորին հարցրեցինք՝ ուզո՞ւմ եք ասել, որ վարչական լծակներ չեն օգտագործվում, թեկուզեւ քաղաքապետի կողմից, ու բոլորը կողմ են քվեարկելու: «Պատգամավորն ինչ վարչական լծակների է տիրապետում, որ օգտագործի…Իսկ քաղաքապետի հետ կապված, իհարկե, քաղաքապետարանում վարչական լծակների տիրապետում են, բայց որ ասեմ էդպես ակտիվություն, ինչ-որ պահանջներ… չկա էդպիսի բան…Այս անգամ ոնց որ թե Արթիիկը տարբերվում է, փորձում ենք, իհարկե, աշխատել, բացատրել, բայց ստիպել, պարտադրել, չկա նման բան չկա…Արթիկում դա դժվար է. ինտելեկտով շատ բարձր են, չես կարող ստիպես, ամեն մեկն իր կարծիքն ունի, պարզապես տեսնեիք, թե ինչ ձեւի պաշտոնական տեղեկագիրը խլեցին իրար ձեռքից, որպեսզի ուսումնասիրեին, ինֆորմացիայի պակաս ունեին: Իսկ հիմա ես արդեն տեսնում եմ իրենց դիրքորոշումը, վերաբերմունքը հանրաքվեի հետ կապված: Կառավարման համակարգ է փոխվում, իրենք պարզ գիտակցում են, որ ավելի լավ է պառլամենտը կառավարի, քան միանձնյա կառավարվի, էդ մի բանով լավ է: Հետո մի լավ բան կա, որ 100 տոկոսով մեծամասնականը վերանում է, որովհետեւ գիտեք նման փոքր համայնքներում մեծամասնական ընտրակարգով Ազգային ժողովի ընտրություններից առաջ թմանանք կար ազգերի միջեւ , չգիտեմ ինչ է ծագում: Հիմա ուրախ են, որ այդ հարցը գոնե դուրս եկավ»,- ասաց պատգամավորը:
Մեր հարցին՝ դուք որպես մեծամասնական ընտրակարգով ընտրված պատգամավոր արդյոք չե՞ք տուժի հենց այդ փոփոխությունից, որոշակի բարդություններ չի՞ լինի Ձեր համար ընտրություններին մասնակցելը, քանի որ արդեն անկուսակցական եք, Մուշեղ Պետոյանն ասաց. «Ի՞նչ պարտադիր է, որ պատգամավորն անպայման նորից պատգամավոր դառնա, ես օրինակ այդ ամբիցիաները չունեմ, որ պարտադիր պատգամավոր պիտի լինեմ նորից»: Իսկ եթե դարձյալ ցանկություն հայտնեք, ո՞ր կուսակցության հետ կմտնեք խորհրդարան, պատգամավորն ասաց. «Չեմ ուզենա որեւէ կուսակցական պատկանելություն ունենալ, այսպես ազատ ավելի լավ է»:
Նունե ԱՐԵՎՇԱՏՅԱՆ
իսկ ով էս դու, իմաստուն, թէ էքստրասենս: Ինչ գիտես այոն է հաղթելու, թէ Մադրիդի Ռէալը…