Երեկ Գյումրու Հաղթանակի կամրջից վայր է նետվել մի տղամարդ, որը, բարեբախտաբար, չի մահացել: Նրան տեղափոխել են Գյումրի բժշկական կենտրոն:
Շիրակի մարզային ոստիկանությունից մեզ հայտնեցին, որ պարզում են՝ նա ինքնասպանության փորձ է կատարե՞լ, թե՞ պատահաբար է վայր ընկել:
Գյումրու բժշկական կենտրոնի լրատվության ու հասարակայնության հետ կապերի պատասխանատու Նարեկ Կիրակոսյանը տեղեկացրեց, որ «Նոյեմբերի 29-ին՝ժամը 17:30-ին Գյումրի բժշկական կենտրոն է տեղափոխվել տարբեր մարմնական վնասվածքներով քաղաքացի: Վերջինս՝ 1970 թ ծնված, Գյումրի քաղաքի բնակիչ Զ. Ս.-ն է: Քաղաքացու մոտ ախտորոշվել է զույգ կրունկոսկորների փակ բազմաբեկորային կոտրվածք՝տեղաշարժով, դեմքի շրջանում սալջարդեր, վերքեր, ձախ ծնկան հոդի առաջային մակերեսի քերծվածք: Զ.Ս.-ին ցուցաբերվել է համապատասխան բուժօգնություն: Հիվանդը կայուն առողջական վիճակով գտնվում է ԲԿ-ի վնասվածքաբանության եւ օրթոպեդիայի բաժանմունքում»:
Նունե ԱՐԵՎՇԱՏՅԱՆ
