Ինչպես ավելի վաղ հայտնել էինք, այսօր հրապարակվեցին բուհերի վարկանիշավորման արդյունքները, համաձայն որոնց՝ 2015թ. լավագույն բուհ է ճանաչվել ԵՊՀ-ն: Լրագրողների հետ զրույցում Կրթության եւ գիտության նախարար Արմեն Աշոտյանը խոսեց նաեւ ԵԽԽՎ-ում ավելի վաղ քվեարկության դրված հակահայկական երկու զեկույցների մասին: «Այն, ինչ տեղի ունեցավ ԵԽԽՎ-ում, սառցաբեկորի գագաթն է միայն: Ակնհայտ է, որ հայկական կողմը լավ է աշխատել: Դա բավարար արդյունք կարելի է համարել: Ակնհայտ է, որ Ուոլթերի զեկույցն ավելի մեծ չարիք էր: Եվրոպայի քաղաքական վերնախավը գիտակցում է, որ ղարաբաղյան խնդրի լուծման միակ ճանապարհը Մինսկի խումբն է»,- ասաց Արմեն Աշոտյանը:
Նախարարը նկատեց, որ Ադրբեջանում նշյալ զեկույցների քվեարկության արդյունքների հետ կապված դժգոհությունը մեծ է. «Պետք է հասկանալ մի կարևոր բան, որ Հայաստանի և Արցախի խնդիրները բացառապես Հայաստանի և Արցախի քաղաքական վերնախավինն են: Եվրոպական կառույցների հետ տարվող աշխատանքը չպետք է կրի արտակարգ իրավիճակի բնույթ: Այն պետք է լինի հետևողական»:
Լուիզա ՍՈՒՔԻԱՍՅԱՆ
