Արթուր Վարդանյանի ղեկավարած զինված խմբի հետ համագործակցության մեղադրանքով կալանավորված պաշտպանության նախկին փոխնախարար Վահան Շիրխանյանին մասնագիտացված բժշկական հաստատություն տեղափոխելու վերաբերյալ նրա պաշտպաններն այսօր վարույթ իրականացնող մարմնին միջնորդություն են ներկայացրել:
Վահան Շիրխանյանի պաշտպաններից Ստեփան Ոսկանյանն Aravot.am-ին ասաց, որ իր պաշտպանյալի առողջական վիճակը շարունակում է ծանր մնալ. «Նրա առողջական վիճակն ամեն րոպե կարող է բարդություններ առաջացնել ու կյանքին վտանգ սպառնալ: Նրա մի ոտքի երակները հեռացված են, մյուս ոտքի երակներում տրոմբ ունի: Բացի դա, նախկինում ինսուլտ, ինֆարկտ էր տարել, սրտի հետ կապված խնդիրներ էլ ունի»:
Ըստ պարոն Ոսկանյանի, մյուս միջնորդությունն էլ խափանման միջոց կալանքը փոխելուն է վերաբերում. «Սպասում ենք, որ գոնե վաղը բուժհաստատություն տեղափոխելու վերաբերյալ միջնորդությանը պատասխան կտրվի, այս խնդիրը հրատապ է»:
Արփինե ՍԻՄՈՆՅԱՆ
