«Ֆեյսբուք»-ն ինչ-որ առումով մենաշնորհային տիրույթ է, որը ստացել է «այլընտրանքային ինտերնետ» անունը: Փաստացի այսօր «Ֆեյսբուք»-ի ղեկավարությունն անում է ամեն ինչ, որպեսզի օգտատերերը ցանցից դուրս չգան»,-այսօր «Անդրադարձ» ակումբում «Ֆեյսբուք» սոցիալական ցանցի ստեղծման օրվա առթիվ հրավիրված մամուլի ասուլիսի ժամանակ ասաց տեղեկատվական անվտանգության փորձագետ Սամվել Մարտիրոսյանը:
«Լրատվական խոշոր գործակալությունները փորձում են ստեղծել այնպիսի հարթակներ, որոնց միջոցով օգտատերը «Ֆեյսբուք»-ում կծանոթանա լրատվությանը՝ մեկ հղում սեղմելու միջոցով: Այդպիսի լրատվամիջոցները շարունակում են հասույթ ստանալ գովազդից: «Ֆեյսբուք»-ը նաեւ լուսանկարների պահուստով թիվ մեկ ցանցն է, հիմա էլ պայքար է գնում տեսանյութերի համար: «Ֆեյսբուք»-ը «Յութուբի» դեմ միջոցներ է ձեռնարկում, որպեսզի վերջինս դադարի համարվել տեսանյութերի թիվ 1 հարթակը»,- նշեց Մարտիրոսյանը:
Նրա փոխանցմամբ՝ համացանցից օգտվողներ 3 միլիարդ մարդկանց կեսը գրանցված է նաեւ «Ֆեյսբուք»-ում: Իսկ Հայաստանում այդ սոցցանցը դեռեւս առաջատար չէ եւ զիջում է «Օդնոկլասսնիկի»-ին: Վերջինս մեկ միլիոն ակտիվ օգտատեր ունի, իսկ «Ֆեյսբուք»-ը՝ 560 հազար:
«Ֆեյսբուք»-ն ակտիվորեն հայաստանյան իրականություն մտավ 2010թ.-ին, երբ «Կինո Մոսկվայի» ամառային դահլիճի համար պայքարում օգտագործվեց որպես քաղաքացիական պայքարի հարթակ: Այդ օրվանից այն դարձավ քաղաքացիական հասարակության ակտիվ գործոններից մեկը: Մինչ այդ քաղաքացիական հասարակությունը հիմնականում ներկայացված էր հասարակական կազմակերպությունների մակարդակով: Այդ տարբերակն էլ արդյունավետ չէ: 2010թ.-ին «Ֆեյսբուք»-ում 50 հազար հայաստանյան օգտատեր կար: Աճն ակնհայտ է»,- ասաց փորձագետը:
Կարդացեք նաև
Նրա բնորոշմամբ՝ այլ երկրներում սոցցանցերի բազմազանություն կա, իսկ Հայաստանում միջին վիճակագրական օգտատերը տեղեկատվություն չի փնտրում եւ կարդում է այն, ինչ մյուս՝ ակտիվ օգտատերերն են առաջարկում: «Դա իրականում վատ է»,-ակնարկեց Մարտիրոսյանը:
Լուիզա ՍՈՒՔԻԱՍՅԱՆ
