Վարչական դատարանում, դատավոր Ավագյանի նախագահությամբ, փետրվարի 10-ին շարունակվում էր ոստիկանությունն ընդդեմ Մաքսիմ Սարգսյանի գործով նախնական դատական նիստը:
Ոստիկանության ներկայացուցիչ Մարթա Մելիքսեթյանը ներկայացրեց հայցի հիմքն ու առարկան եւ փաստական հանգամանքները. «Սեպտեմբերի 1-ին կազմակերպել են բողոքի ակցիա, բողոքի ակցիայի ժամանակ ոստիկանությունը կատարել է հասարակական կարգի պահպանման ծառայություն, քաղաքացիները դուրս են եկել երթեւեկելի գոտի, եւ ոստիկանության պահանջը՝ ազատել երթեւեկելի գոտին, չի կատարվել: Մաքսիմ Սարգսյանի նկատմամբ վարչական ձերբակալություն է իրականացվել»:
Ոստիկանությունը պահանջում է Մաքսիմ Սարգսյանին պատասխանատվության ենթարկել վարչական իրավախախտումների օրենսգրքի 182 հոդվածով, այն է՝ ոստիկանության ծառայողի օրինական պահանջը չկատարելը:
Մարթա Մելիքսեթյանը ներկայացրեց ոստիկանության հասարակայնության հետ կապերի եւ լրատվության բաժնի կատարած տեսագրությունները, որոնք կատարվել են սեպտեմբերի 1-ին տեղի ունեցած բողոքի ակցիայի ընթացքում, որտեղ երեւում է, որ Մաքսիմ Սարգսյանին պահանջ է ներկայացել, սակայն պահանջը չի կատարել:
Կարդացեք նաև
Մաքսիմ Սարգսյանի ներկայացուցիչ Հայարփի Սարգսյանը հայտարարեց, որ կողմը հակընդդեմ հայց է ներկայացրել, սակայն այն վերադարձվել է, կողմը այն բողոքարկել է, եւ այժմ բողոքը գտնվում է վարչական վերաքննիչ դատարանում՝ հունվարի 13-ին վարույթ է ընդունվել, սակայն մինչեւ հիմա տեղեկություն չունեն: Հայարփի Սարգսյանը միջնորդեց հետաձգել դատական նիստը, քանի որ կողմերի համար ոչ իրավահավասար պայմաններ են ստեղծվել:
Դատարանը բավարարեց միջնորդությունը, դատական նիստը հետաձգվեց:
Ամի ՉԻՉԱԿՅԱՆ
