Կիլիկիայի թագավոր Լեւոն Մեծագործի անվան Երուսաղեմի տաճարի ինքնիշխան ռազմական միաբանության (հայ տամպլիերներ) նախաձեռնությամբ առաջիկայում նախատեսվում է այլ երկրների տաճարականների այցը Հայաստան: Այս մասին Aravot.am-ին հայտնեց միաբանության գերագույն առաջնորդ Բագրատ Լալայանը: «2015թ. մայիսին կազմակերպված միջոցառման շրջանակում Երեւան ժամանեցին տարբեր երկրների ասպետներ եւ այցելեցին Ծիծեռնակաբերդ: Տաճարականների միջազգային միաբանությունը համապատասխան փաստաթուղթ հրապարակեց՝ ճանաչելով Հայոց Ցեղասպանությունը: Նախատեսվում է, որ այս տարի մայիսին եւս տաճարականները կայցելեն Հայաստան, եւ այս նախաձեռնությունը շարունակական է լինելու: Օգտագործելու ենք մեր կապերն ու հնարավորությունները՝ Հայոց ցեղասպանության միջազգային ճանաչմանը նպաստելու համար»,- նշեց նա:
Խոսելով առաջիկա այլ ծրագրերից՝ մեր զրուցակիցը տեղեկացրեց, որ այս տարի ամենայն հավանականությամբ կնկարահանվի Կիլիկիայի հայկական թագավորության մասին գեղարվեստական ֆիլմ. «Նաեւ հետեւողական ենք լինելու Հանրային խորհրդի ընդունած որոշմանը, համաձայն որի՝ Հանրապետության հրապարակում առաջարկում ենք տեղադրել Տիգրան Մեծի արձանը»:
Ասպետական միաբանությունը նաեւ ռազմական կազմակերպություն է, ուստի այս տարի առավել մեծ ուշադրություն է դարձնելու սահմանին զոհված զինվորների եւ պայմանագրային զինծառայողների ընտանիքներին օգնություն տրամադրելուն:
Կարդացեք նաև
Լուիզա ՍՈՒՔԻԱՍՅԱՆ
