«Ինձ Տիգրան Մազմանյանը զանգահարեց եւ ասաց, որ խաղաղ ցույց են իրականացնում, որտեղից ապօրինաբար բերման են ենթարկել: Քաղաքացիական հագուստով ոստիկանն ասել է, որ վարչական բերում է»,- «Ազատություն» ռադիոկայանի ուղիղ եթերում հայտարարեց ակտիվիստ Տիգրան Մազմանյանի փաստաբան Արա Ղարագյոզյանը:
Հիշեցնենք, որ քիչ առաջ նախագահական նստավայրի դիմացից բերման ենթարկվեցին մի քանի ակտիվիստներ: Նրանք ցույց էին իրականացնում ի պաշտպանություն կալանավորված քաղաքացիական ակտիվիստ Վարդգես Գասպարիի: Բերման ենթարկվածների մեջ է նաեւ Տիգրան Մազմանյանը:
Փաստաբան Արա Ղարագյոզյանը նշեց, որ վարչական բերման ժամանակ «անձանց չէին անօրինական ազատությունից զրկում: Սա իրականում բերման ենթարկելու գործընթաց է: Իմ պաշտպանյալներն այժմ ապօրինաբար պահվում են ոստիկանության շենքում: Իմ շորից քաշելով դուրս հանեցին, ինչը փաստաբանի գործունեության խոչընդոտում է եւ քրեորեն պատժվող արարք է: Ես զանգահարել է Մարդու իրավունքների պաշտպանի գրասենյակ, որպեսզի միջնորդեն, որ տեսակցեմ իմ պաշտպանյալին»:
Փաստաբանին թույլ չեն տվել տեսակցել իր պաշտպանյալին, պատճառաբանելով, որ բերման ենթարկված ակտիվիստը գրավոր դիմում չի ներկայացրել այդ մասին: Արա Ղարագյոզյանն այս առնչությամբ նշեց, որ Մարդու իրավունքների եվրոպական դատարանը բազմաթիվ որոշումներ ունի այսպիսի դեպքերի համար. «Եթե ոստիկանությունում գտնվող անձը բանավոր հայտարարում է, որ ինքը պաշտպան է ցանկանում, ապա ոստիկանությունն անմիջապես պետք է ապահովվեր, որ անձն իրականացնի իր սահմանադրական իրավունքը»:
Կարդացեք նաև
Լուսանկարը` Նարինե Ղալեչյանի ֆեյսբուքյան էջից
Աշոտ ԻՍՐԱԵԼՅԱՆ
