Անի Խաչատրյանը՝ իր աշխատանքների մասին
Մանդալան հին մշակույթ է, այն սանսկրիտից նշանակում է շրջան եւ խորհրդանշում է տիեզերքն ու միասնությունը: Այդ խորհրդանիշը բնորոշ է բուդդիզմին եւ հինդուիզմին, այն Արեւելքում կրոնական ծեսերի բաղկացուցիչ մաս է:
Մեր զրուցակիցը Անի Խաչատրյանն է, որը մանդալաներ է գործում երկու տարուց ավելի, դա նրա հոբին է: Չնայած մանդալայի դեպքում գույներն ունեն իրենց նշանակությունը, բայց Անին օգտագործում է այն, ինչ այդ պահին ցանկանում եւ զգում է: Միայն սեւն է, որ չենք տեսնի նրա աշխատանքներում: «Մանդալաներում սեւը մահվան գույնն է, այդ պատճառով էլ չեմ օգտագործում: Իսկ մնացած գույներն ընտրում եմ տվյալ պահի զգացողությամբ»,- ասում է նա: Գույները մանդալայի ընդամենը մի կողմն են ներկայացնում: Այստեղ նախշերը նույնպես իմաստալից են: Ամենատարածվածներից են շրջանները, ծաղկային պատկերները, պարուրաձեւը, եռանկյունիներն ու քառակուսիները:
Ծաղիկները, որպես ամբողջություն՝ ներկայացնում են մեր գիտակցությունը: Ծաղկի յուրաքանչյուր տեսակ խորհրդանշում է կոնկրետ հատկություն, օրինակ՝ իմաստությունը, մաքրությունը, բարությունը, հաստատակամությունը, սերը, ընկերությունը: Պարուրաձեւը խորհրդանշում է աճը եւ ուսումը: Նրանք նոր հեռանկարներ են բերում եւ ներկայացնում են փոփոխություն: Եռանկյունը կապված է երազանքների, նպատակների եւ մտապատկերների հետ: Քառակուսին կայունությունն է ու ամրությունը, ցույց է տալիս ապահովություն եւ մտքերի հաստատում:
Մանդալաների օրինակներ հանդիպում ենք նաեւ հայկական մշակույթում՝ խաչքարերի զարդանախշերում եւ մանրանկարչության մեջ: Դրանք ունեն նույն խորհուրդը՝ հավերժություն, ամբողջականություն: Կարեւոր է գործողի տրամադրությունն ու էներգետիկան, որը նա ունեցել է աշխատելիս: Յուրաքանչյուր ավարտված մանդալան՝ իր նախշով, գույնով եւ ձեւով, ոչ միայն արվեստի գործ է, այլեւ վարպետից մի մասնիկ: «Մանդալան իր ստեղծողի էներգիան է պարունակում: Կարելի է ասել, որ այն կենդանի էակ է: Երբ վատ տրամադրությամբ ես գործում, ամբողջովին հանգստանում ես ու խաղաղվում: Մեդիտացիոն ազդեցություն ունի: Սակայն այդ մանդալան բացասական էներգետիկա է ունենում: Այդ պատճառով էլ փորձում եմ աշխատելիս լավ տրամադրություն ունենալ, հանգիստ միջավայրում լինել»,- ասում է Անին: Նա իր աշխատանքները վաճառում է օնլայն խանութներում: Ի դեպ, նրա մոտ նախշերը երբեք չեն կրկնվում, ամեն մեկը յուրահատուկ է: Իսկ որ ամենակարեւորն է՝ յուրաքանչյուր մանդալա գտնում է իր տիրոջը:
ՄԱՐԻԱՄ ՊԵՏՐՈՍՅԱՆ
«Առավոտ» օրաթերթ
01.03.2016
