«Իմ կողմից կուսակցությունը ստեղծելը բացարձակ կապ չունի Ռոբերտ Քոչարյանի վերադարձի հետ»,- այսօր խորհրդարանում լրագրողների հետ զրույցում հայտարարեց ՀՀ նախկին արտգործնախարար, ԲՀԿ խմբակցության պատգամավոր Վարդան Օսկանյանը:
Հիշեցնենք, նախօրեին, «Ազատություն» ռադիոկայանին տված հարցազրույցում Վարդան Օսկանյանը հաստատել էր, որ կուսակցություն է ստեղծում:
«Քոչարյանն այս կուսակցության հետ կապ չունի, բայց ես ինձ չեմ դնելու այն վիճակի մեջ, որ անընդհատ ինձ տարանջատեմ Քոչարյանից: Ես այդպիսի խնդիր չունեմ: Վարդան Օսկանյանի ռեսուրսով եմ պատրաստվում ժողովրդի քվեն ստանալ, մեր անելիքներով ու մեր ծրագրով»,- ասաց նա:
Վարդան Օսկանյանը կարծում է, Ռոբերտ Քոչարյանի իշխանությունը բազմաթիվ թերություններ ունեցել է, բայց նաեւ մեծ հաջողություններ է ունեցել` «հատկապես այսօրվա տնտեսական իրավիճակի ու արտաքին քաղաքականության ֆոնին»:
Կարդացեք նաև
Վարդան Օսկանյանը կարծում է, որ հասարակությունը, ժողովուրդը շատ հարցերում դրականորեն է հիշում այդ շրջանը. «Եկեք ամեն ինչ չսեւացնենք»:
Լրագրողներից մեկը հետաքրքրվեց` կօգնի՞ Քոչարյանի անունը իր կուսակցությանը, թե ոչ: «Կուսակցությունը կլինի, կաշխատեն, ժողովուրդը իր գնահատականը կտա»:
Վարդան Օսկանյանը խուսափեց նաև անուններ հնչեցնել, թե ովքե՞ր են լինելու իր ղեկավարած կուսակցությունում: Լրագրողների դիտարկմանը`ԲՀԿ-ից հեռացած կամ հեռացողները կլինե՞ն, ասենք`Ստեփան Մարգարյանը, Վահե Հովհաննիսյանը, Էլինար Վարդանյանը, նա ասաց. «Ոչ հաստատելու եմ, ոչ հերքելու եմ: Այն պահին, երբ վերջնական որոշում կլինի կիմանաք»,- ընդգծեց նա:
Այլ մանրամասները` տեսանյութում
Նելլի ԳՐԻԳՈՐՅԱՆ
