«Հայաստանում գրանցված են 7 տասնյակից ավելի կրոնական կառույցներ, որոնցից շատերը ոչ ավանդական կրոնական կազմակերպություններ են` աղանդներ: Որոշները ոչ կրոնական գործունեությամբ են զբաղված»,-այս մասին այսօր «Պոստ Սկրիպտում» մամուլի ակումբում ասաց «Ազգային արժեքների պահպանման ճակատ» ՀԿ նախագահ Սևան Աղաջանյանը:
«Մեր տեղեկություններով` չորս կրոնական կազմակերպությունների ղեկավարը միեւնույն անձն է: Չորս կազմակերպություններն էլ գրանցված են որպես տարբեր դավանանքի կրոնական կազմակերպություններ: Ծիծաղելի փաստ ենք արձանագրում` եթե մի մարդ հանդիսանում է մեկ կրոնական կազմակերպության ղեկավար, չի կարող չորս դավանաբանության հարել: Հետեւաբար, այդ կազմակերպություններ չեն զբաղվում կրոնական գործունեությամբ: Պետական մարմիններին կոչ եմ անում ստուգումներ անցկացնել»,-նշեց նա:
Աղաջանյանը հավելեց, որ չեն կարողացել պարզել, թե նշյալ կառույցներն ինչ գործունեություն են ծավալում:. «Մեկի անունը կապված է Միացյալ նահանգների, մյուսինը` Ֆրանսիայի հետ: Իմ կարծիքով` դրսից եկող գումարների հետ է խնդիրը կապված»:
Բանախոսը հիշեցրեց, որ «Խղճի ազատության եւ կրոնական կազմակերպությունների մասին» ՀՀ օրենքով սահմանվում է, թե որ կազմակերպությունները կարող են կոչվել կրոնական. «Այդպիսիք կարող են կոչվել այն կազմակերպությունները, որոնք ունեն 200-ից ավելի անդամներ եւ հարում են ինչ-որ դավանանքի»:
Կարդացեք նաև
Սեւան Աղաջանյանը նաեւ նկատեց, որ օրենքն արգելում է հոգեւորսությունը, սակայն չի սահմանում, թե ինչ է նշանակում «հոգեւորսություն»:
«Եթե այդ տերմինը դիտարկենք միջազգային տարբերակով, ապա հոգեւորսություն է համարվում, երբ հոգեկան եւ ֆիզիկական տարբեր ճնշումների միջոցով մարդկանց համոզում են ինչ-ինչ գործողություններ կատարել` ներքաշելով որոշ կրոնական խմբավորումների մեջ»,-Aravot.am-ի հետ զրույցում ասաց «Քայքայիչ պաշտամունքից տուժածների օգնության եւ վերականգնողական կենտրոնի» նախագահ Ալեքսանդր Ամարյանը:
Ինչ վերաբերում է նշյալ չորս կազմակերպություններին, Ամարյանի խոսքով` դրանց գրանցումն օրինական է, իսկ գործունեությունը` ոչ. «Ակտիվ մասնակցում են քաղաքականությանը, ու քանի որ արտասահմանյան կառույցի ներկայացուցիչներ են, ոչ հայահաճո գործ են անում: Հասարակ հավատացյալների մասին ոչինչ չեմ ասի, որովհետեւ նրանք իսկական հավատացյալներ են, իսկ ահա հոգեւոր ղեկավարությունը զբաղված է փողերի լվացումով: Ֆինանսավորումն էլ ԱՄՆ-ից է, ինչը մեր օրենքով արգելված է»:
Լուիզա ՍՈՒՔԻԱՍՅԱՆ
