Ապրիլի 5-ին «Պոստ Սկրիպտում» մամուլի ակումբի կայացած ասուլիսում տեղեկատվական անվտանգության մասնագետ Տիգրան Քոչարյանը պատասխանելով լրագրողի հարցին՝ արդյոք հնարավո՞ր է վտանգ Նախիջեւանի կողմից, պատասխանեց. «Նախիջեւանի պարագայում գործում են Կարսի պայմանագրի դրույթները, Ռուսաստանը եւ Թուրքիան հարցեր ունեն լուծելու, Նախիջեւանի ստատուսի պատճառով կարող են աշխարհի մեծերը խառնվել: Կարծեմ երկու տարի առաջ մեր զինված ուժերը Նախիջեւանի չեզոք գոտում բավականին լավ դիրքեր են գրավել, եւ եթե ինչ-որ բան լինի, առաջինը Նախիջեւանը կտուժի»::
Նա անդրադարձավ նաեւ ԱՄՆ Պետդեպի այն հայտարարությանը, որ Ղարաբաղի խնդիրը պետք է լուծվի՝ հաշվի առնելով ինքնորոշման իրավունքը: Տիգրան Քոչարյանը դա հայտարարության ստանդարտ տեքստ որակեց, որտեղ էլի կողմերի միջեւ հավասարության նշան է դրվել. «Դա նույնն է, որ Հավայան կղզիները ճանաչել էին Արցախի անկախությունը, բայց նաեւ Խոջալուի մասին են խոսել»:
Նրա ձեւակերպմամբ, այս պահին բոլոր խոշոր խաղացողները հետեւում են իրավիճակին, եւ այս պարագայում հակառուսական կամ հակաամերիկյան տրամադրություններ առաջացնելը զավեշտալի կլինի:
Գոհար ՀԱԿՈԲՅԱՆ
