ՕԵԿ պատգամավոր Մհեր Շահգելդյանն այսօր ԱԺ-կառավարություն հարցուպատասխանի ժամանակ ՊՆ նախարար Սեյրան Օհանյանին հարցրեց. «Երբ կա Թուրքիայի կողմից դիվանագիտական աջակցությունը, մենք պետք է հակառակորդի կողմից սպասենք ցանկացած դրսեւորման: Արդյոք մենք նոր մոտեցումներ չունե?նք՝ տեղում արտադրվող զինտեխնիկայով մեր բանակն ապահովելու համար»:
Սեյրան Օհանյանը պատասխանեց, որ այդ ուղղությամբ մենք աշխատանքներ ենք կատարում, բյուջետային միջոցներ ունենք, որոնք նախատեսված են հայրենի արտադրության տեխնոլոգիաներ ստեղծելու, ներդնելու համար:
ՀՀԿ պատգամավոր Վահրամ Մկրտչյանի հարցին պատասխանելիս ընդգծեց, որ հակառակորդը ո՛չ ռազմավարական, ո՛չ մարտավարական առումով հաջողություն չի ունեցել:
ՀՀԿ պատգամավոր Մարգարիտ Եսայանն էլ հարցրեց. «Այսօր այն տղաները, որոնք իրենց կյանքով պաշտպանեցին մեզ, նրանք հիմնականում այնպիսի ընտանիքներից են, որոնց սոցիալական վիճակը մեղմ ասած բարվոք չէ: Կարծում եմ, այսօր չկա ընտանիք, որը վարկային բեռի տակ կքած չէ: Մեր կառավարությունը ունի խնդիր: Գուցե որոշում կայացնի, որ վերջին օրերին զոհված զինծառայողների ընտանիքների վարկերը պետությունը կամ բանկերը վերցնեն իրենց վրա: Այդ տղաներն իրենց գործը կատարել են փառահեղ, մենք, որպես պետություն, պետք է կոնկրետ լուծում գտնենք»:
Կարդացեք նաև
Վարչապետ Հովիկ Աբրահամյանը պատասխանեց, որ վարկերը պետք է քննարկվեն, վերլուծեն, հասկանան՝ ինչի մասին է խոսքը. «Որ պետք է օգնենք՝ դա փաստ է: Օգնել ենք, օգնում ենք եւ շարունակելու ենք օգնել»:
Հռիփսիմե ՋԵԲԵՋՅԱՆ
