Պետք է հասկանանք, որ Ռուսաստանը տարածաշրջանում լուծում է ոչ միայն ՀՀ-ի հետ լավ հարաբերություններ ունենալու խնդիր, այլեւ հետաքրքրված է Ադրբեջանին իր ներազդեցության գոտի ներքաշելով:
Քաղաքագետ Հրանտ Մելիք Շահնազարյանի խոսքով` Ադրբեջանին զենք վաճառելու հարցում Ռուսաստանը շարունակում է մնալ իր համոզմանը, թե այդ կերպ տարածաշրջանում հավասարակշռություն է պահպանում: «Բայց տեսանք, որ Ադրբեջանի ագրեսիան, միեւնույնն է, տեղի ունեցավ: Պաշտոնական Երեւանը դժգոհ է Մոսկվայի գործողություններից եւ գտնում է, որ Ռուսաստանի վարքը չի բխում դաշնակցային գործընկերոջ պարտավորություններից»,-այսօր «Պոստ Սկրիպտում» մամուլի ակումբում ասաց նա:
«Ռուսաստանին պարտադրելու ռեսուրս, որպեսզի Ադրբեջանին զենք չվաճառի, հայկական կողմը չունի: Մենք մի խնդիր ենք լուծում, Ռուսաստանը` մեկ այլ: Հայկական կողմը շարունակելու է պնդել, որ այդ զենքը հնարավորինս քիչ վաճառվի կամ ընդհանրապես չվաճառվի: Որքանով կհաջողվի, ժամանակը ցույց կտա: Մինչ այս պահը դա մասնակիորեն է հաջողվել:
Նախորդ տարի Լավրովի այցից հետո Ադրբեջանը պետք է մասնակցեր զենքի ցուցահանդես- վաճառքի: Հայկական կողմի ջանքերով Ադրբեջանի առաջ արգելքներ դրվեցին եւ այդ երկիրը անհրաժեշտ խմբաքանակի զենք ձեռք չբերեց: Արգելքն, իհարկե, որոշ չափով հաջողվեց: Պետք է հասկանանք, որ Ռուսաստանը տարածաշրջանում լուծում է ոչ միայն ՀՀ-ի հետ լավ հարաբերություններ ունենալու խնդիր, այլեւ հետաքրքրված է Ադրբեջանին իր ներազդեցության գոտի ներքաշելով»,-նշեց բանախոսը:
Կարդացեք նաև
Լուիզա ՍՈՒՔԻԱՍՅԱՆ
