Ինչպես ավելի վաղ հայտնել էինք, Երեւանի Աջափնյակ եւ Դավիթաշեն վարչական շրջանների Ընդհանուր իրավասության դատարանում այսօր դատավոր Վարդան Աբրահամյանի նախագահությամբ շարունակվեց հիրոմանտ, էքստրասենս Անի Մաջնունյանի սպանության գործով քննությունը:
«Յանուս» արտիստական թատրոնի տնօրեն եւ գլխավոր ռեժիսոր, 1995 թ. ծնված Մուշեղ Մխիթարյանին մեղադրանք է առաջադրվել ՀՀ քրեական օրենսգրքի 104-րդ հոդվածի 2-րդ մասի 8-րդ կետով, այսինքն՝ այն բանի համար, որ նա ապօրինաբար Անի Մաջնունյանին դիտավորությամբ կյանքից զրկել է, որը զուգորդվել է ավազակությամբ:
Այս գործով հարցաքննվեց եւս մեկ վկա, որը ժամանակին աշխատել է ամբաստանյալ Մուշեղ Մխիթարյանի հետ:
Դատավորի հարցմանն ի պատասխան նա հաստատեց, որ ճանաչում է ամբաստանյալին, իսկ թե որտեղից, աղջիկն ասաց. «Նա ասում էր` իբր զգացմունքներ ունի իմ հանդեպ…Միասին աշխատել ենք «Նարնջագույն փղիկ» երեխաների զարգացման կենտրոնում` 2013 թվականից: Ասաց, որ իբր սիրում է ինձ»:
Կարդացեք նաև
Դատավորը նույն հարցն ուղղեց ամբաստանյալին: Վերջինս հաստատեց, որ ճանաչում է վկային եւ հավելեց. «Ես նրան սիրում եմ»:
Ապա վկան շարունակեց. «Եղբայրներս արգելեցին նրան շփվել ինձ հետ: Երկու տարի հետո հայտնվեց, պարզվեց` ուներ երեխա: Ասում էր, որ իր կնոջը չի սիրում: Կնոջ անունը չգիտեմ: Անընդհատ զանգում էր ինձ: Ասացի, որ վերջնական հանդիպենք եւ բաժանվենք իրարից: Հանդիպեցինք, ասաց, որ ինձ կարող է վտանգ սպառնալ եւ պետք է զգույշ լինեմ: Ասում էր, որ իրեն շենքի մուտքում սպառնացել են եւ ինձ հետ էլ կարող են մի բան անել` նրա համար, որ Մուշեղի հետ կապ ունեմ: Ասաց, որ իր ընկերուհուն են սպանել` ծանոթ-մտերիմին: Ասում էր, որ Մաջնունյանն իր մտերիմ ընկերն է եւ որոշ հարցերում օգնել է իրեն»:
Դատարանի որոշմամբ, հաջորդ նիստը կկայանա ապրիլի 28-ին: Հիշեցնենք, որ նախորդ նիստին հարցաքննվել էր վկան, որն, իր պնդմամբ, տեսել է արնաքամ լինող Անի Մաջնունյանին, ինչպես նաեւ` «Հայաստանի նոր քաղաքական մշակույթ» կուսակցության նախագահ Անի Զախարյանը եւ Անի Մաջնունյանի մայրը:
Լուիզա ՍՈՒՔԻԱՍՅԱՆ
