Հայկական կողմի համար հունիսի 20-ին նախանշված Սերժ Սարգսյան-Իլհամ Ալիեւ հանդիպման առանցքը լինելու է Վիեննայում ձեռք բերված պայմանավորվածությունները կյանքի կոչելու հնարավորությունները դիտարկելը եւ քննարկելը: Այս մասին հունիսի 16-ին «Մեդիա Կենտրոնում» ասաց ՀՀ ԱԺ արտաքին հարաբերությունների մշտական հանձնաժողովի նախագահ Արտակ Զաքարյանը:
«Վիեննայում հստակ ասվեց, որ պետք է ընդլայնել ԵԱՀԿ ներկայացուցչի մոնիթորինգային կարողությունները, ունենալ հետաքննության մեխանիզմներ եւ կայուն հրադադար: Ամեն ինչ կախված է լինելու Ադրբեջանի վարքից: Հայկական կողմը միշտ ողջունել է հանդիպումները եւ Մինսկի խմբի համանախագահների նախաձեռնությունները: Հույս ունենանք, որ Ռուսաստանի նախագահի բարձր առաքելության պայմաններում հնարավոր կլինի Ադրբեջանին պարտադրել հաշվի նստել այն պարզ իրողության հետ, որ ռազմական ճանապարհով ԼՂ խնդիրը չունի լուծում: Ամենաիրատեսական մոդելը հետաքննության մեխանիզմների ներդրումն է, ինչը համանախագահներին թույլ կտա անել հասցեական հայտարարություններ»,- ընդգծեց նա:
Արտակ Զաքարյանի խոսքով` Սանկտ-Պետերբուրգում սպասվելիք հանդիպմանը «բանակցություն» որակում տալը ճիշտ չէ, քանի որ բանակցելու բան չկա. «Կա պարզ իրականություն: Պետք է ղարաբաղաադրբեջանական սահմանին ունենալ կայուն եւ երաշխավորված հրադադար»:
ՀՀ պաշտպանության նախկին նախարար Վաղարշակ Հարությունյանն էլ նշեց. «Ադրբեջանը ցույց տվեց, որ պատասխանատու չէ իր քայլերի համար: Ադրբեջանի մարտավարությունը բխում է ստեղծված իրավիճակից: Նա չի ուզում գնալ որեւէ զիջման: Բանակցային ճանապարհը նրա համար ճանապարհ չէ, քանի որ պատրաստ չէ գնալ զիջումների: Ադրբեջանը վախենում է լայնածավալ պատերազմ սկսել, որովհետեւ դա իրեն թույլ չի տալիս մեր բանակի մարտունակությունը: Հետեւաբար, գիշերով, խախտելով հրադադարի պայմանագիրը, լոկալ պատերազմ է սկսում` համանախագահներին շանտաժի ենթարկելու համար, թե` բերեք մի փաստաթուղթ, որով Ղարաբաղն ինձ եք տալիս»:
Կարդացեք նաև
Ըստ Հարությունյանի` Ադրբեջանը պատերազմի սպառնալիքով ցանկանում է, որպեսզի հայկական կողմը զիջումների գնա. «Հայկական կողմը ճիշտ պայմաններ է դրել, ի՞նչ բանակցությունների կամ տարածքի վերադարձի մասին է խոսքը: Ուստի Սանկտ-Պետերբուրգում առաջընթացի չեմ սպասում, Ադրբեջանի վրա ճնշումներ պետք է լինեն»:
Լուիզա ՍՈՒՔԻԱՍՅԱՆ
Լուսանկարը` «Մեդիա Կենտրոնի»:
