Հունիսի 16-ին «Արամ Խաչատրյան» համերգասրահում Միջազգային երաժշտական մրցույթների համաշխարհային ֆեդերացիայի (The World Federation of International Music Competitions- WFIMC) 60-րդ գլխավոր վեհաժողովի շրջանակում տեղի ունեցավ Հայաստանի պետական երիտասարդական նվագախմբի համերգը WFIMC-ի դափնեկիրների հետ։ Նվագախմբի հետ ելույթ ունեցան մենակատարներ Բարնաբաս Կելեմենը (ջութակ), Կատալին Կոկասը (ալտ), Գեորգի Չաիձեն (դաշնամուր), Արիունբաատար Գանբաատարը (բարիտոն)։ Ծրագրում հնչեցին Էդուարդ Հայրապետյանի Պավան կամերային նվագախմբի համար ստեղծագործությունը, Վոլֆգանգ Ամադեուս Մոցարտի Սիմֆոնիա-կոնցերտ ջութակի, ալտի և նվագախմբի համար, Պյոտր Չայկովսկու Դաշնամուրի կոնցերտ թիվ 1 գործերը, Ջոակինո Ռոսինիի Ֆիգարոյի արիան ՙՍևիլյան սափրիչը՚ օպերայից, Պյոտր Չայկովսկու Յելեցկիի արիան ՙՊիկովայա դամա՚ օպերայից, Ռուջերո Լեոնկավալլո՝ ՙՊայացներ՚ օպերայի նախերգանքը։
Համերգը ղեկավարում էր Հայաստանի պետական երիտասարդական նվագախմբի գեղարվեստական ղեկավար և գլխավոր դիրիժոր Սերգեյ Սմբատյանը։ Նա ընդգծեց, որ եթե երեք տարի առաջ հպարտությամբ ասում էին, որ անդամակցել են Միջազգային երաժշտական մրցույթների համաշխարհային ֆեդերացիային, ապա այսօր հպարտությամբ ընդգծում են, որ այդ մեծ երաժշտական ընտանիքը հյուրընկալվել է Հայաստանում։
Երեկոյին ներկա էին Միջազգային երաժշտական մրցույթների համաշխարհային ֆեդերացիայի 60-րդ գլխավոր վեհաժողովին մասնակցող պատվիրակները։
Միջազգային երաժշտական մրցույթների համաշխարհային ֆեդերացիայի հոբելյանական վեհաժողովը Երևանում կազմակերպվել է ՀՀ Նախագահի տիկին Ռիտա Սարգսյանի հովանու ներքո, ՀՀ մշակույթի նախարարության աջակցությամբ և Արամ Խաչատրյանի անվան միջազգային մրցույթի հրավերով։
Համերգի տեսագրությունը կարելի է դիտել հետևյալ հղմամբ:
«Արամ Խաչատրյան-մրցույթ» մշակութային հիմնադրամ
