Եվրոպայի խորհրդի խորհրդարանական վեհաժողովի (ԵԽԽՎ) ամառային նստաշրջանի լիագումար նիստին Ադրբեջանի պատվիրակության անդամները «հարձակվեցին» ԵԽԽՎ-ում հայկական պատվիրակության անդամ, ԲՀԿ խմբակցության ղեկավար Նաիրա Զոհրաբյանի վրա:
Վեհաժողովի` մշակույթի եւ ժողովրդավարության խնդիրներին առնչվող զեկույցի քննարկման ժամանակ տիկին Զոհրաբյանը հայտարարեց Թուրքիայի ներկայիս տարածքում հայկական մշակութային հետքի հետեւողական ոչնչացման մասին:
Տիկին Զոհրաբյանը մասնավորապես ԵԽԽՎ ամբիոնից մտահոգություն հայտնեց. «Թուրքիայում եւ նրա եղբայր Ադրբեջանում, որտեղ հողին հավասարեցվեց Ջուղայի պատմական խաչքարերի գերեզմանոցը, պետականորեն ծրագրավորված՝ փորձում են վերացնել ցանկացած հայկական հետք»:
Այս ելույթը «չմարսեցին» ադրբեջանական պատվիրակության անդամները և հերթով սկսեցին հակադարձել:
Կարդացեք նաև
Օրինակ` Սահիբա Գաֆարովան ի պատասխան նետեց. «Ուզում եմ շեշտել, որ Ադրբեջանը Թուրքիայի երիտասարդ եղբայրը չէ, ինչպես որոշ հայ պատվիրակներ են հայտարարում: Մենք ունենք մեր սեփական մշակույթը և զարգացնում ենք այն: Ադրբեջանը, միավորելով Արևմուտքի և Արևելքի մշակույթները, տիրապետում է հարուստ մշակութային ժառանգության»:
Անդրադառնալով Նաիրա Զոհրաբյանի այն հայտարարություններին, թե Ադրբեջանում և Թուրքիայում ոչնչացվում են հայկական պատմամշակութային արժեքները, ԵԽԽՎ ադրբեջանական պատվիրակության մեկ այլ անդամ Գանիրա Փաշաևան հայտարարեց. «Այն, ինչ հայտարարում է տիկին Զոհրաբյանը, չի համապատասխանում իրականությանը: Ավելին, Հայաստանը ներխուժել է Ադրբեջանի տարածք և, ցավոք, ոչնչացրել մեր կրոնական հուշարձանները, որոնք տեղակայված էին այդ տարածքում»:
Տաթև ՀԱՐՈՒԹՅՈՒՆՅԱՆ
