Ռուս-ուկրաինական պատերազմի գոտում հոկտեմբերի 31-ին եւ նոյեմբերի 1-ին շարունակվել են փոխադարձ հարվածները։ Վերջին 24 ժամվա ընթացքում արձանագրվել են ռուսական զանգվածային օդային հարձակումներ Ուկրաինայի տարածքի ուղղությամբ, ինչպես նաեւ ուկրաինական անօդաչու սարքերի հարվածներ Ռուսաստանի արդյունաբերական ձեռնարկություններին։
Միաժամանակ Ստամբուլում Ուկրաինայի եւ Թուրքիայի նախագահները քննարկել են բանակցային գործընթացի հնարավոր շարունակությունը եւ Սեւ ծովում նավագնացության անվտանգությունը։
Ռուսաստանը Ուկրաինայի ուղղությամբ արձակել է 433 անօդաչու սարք
Ուկրաինայի ռազմաօդային ուժերի նոյեմբերի 1-ի հաղորդագրության համաձայն՝ հոկտեմբերի 31-ի ժամը 18։00-ից մինչեւ նոյեմբերի 1-ի առավոտյան Ռուսաստանը Ուկրաինայի ուղղությամբ արձակել է 433 հարվածային անօդաչու սարք։ Դրանց թվում եղել են «Շահեդ» տիպի ԱԹՍ-ներ, ինչպես նաեւ խաբուսիկ թիրախներ։
Կարդացեք նաև
Ուկրաինական կողմի տվյալներով՝ նոյեմբերի 1-ի ժամը 7։30-ի դրությամբ հակաօդային պաշտպանության ուժերը խոցել կամ էլեկտրոնային պայքարի միջոցներով չեզոքացրել են 371 անօդաչու։ Հարվածներ են գրանցվել 16 վայրում, իսկ անօդաչուների բեկորների անկում՝ եւս 14 վայրում։
Ուկրաինայի ռազմաօդային ուժերի հաղորդագրության հրապարակման պահին մի քանի տասնյակ անօդաչու դեռեւս գտնվում էր երկրի օդային տարածքում։
Ուկրաինական ԱԹՍ-ները հարվածել են Ռուսաստանի նավթավերամշակման գործարանին
Նոյեմբերի 1-ի գիշերը անօդաչու սարքերի հարձակման է ենթարկվել Ռուսաստանի Նիժնի Նովգորոդի մարզի Կստովո քաղաքի արդյունաբերական ձեռնարկությունը։
Մարզի նահանգապետ Գլեբ Նիկիտինը հայտնել է, որ ձեռնարկությունը վնասվել է, հրդեհ է բռնկվել, սակայն զոհեր չկան։
Ուկրաինական լրատվամիջոցների հաղորդմամբ՝ թիրախը եղել է «ԼՈՒԿՕՅԼ-Նիժեգորոդնեօրգսինտեզ» նավթավերամշակման գործարանը։ Այն Ռուսաստանի խոշորագույն նավթավերամշակման ձեռնարկություններից է՝ տարեկան մինչեւ 17 միլիոն տոննա նավթ վերամշակելու հզորությամբ։
Ռուսաստանի պաշտպանության նախարարությունը, իր հերթին, հայտնել է, որ հոկտեմբերի 31-ի երեկոյից մինչեւ նոյեմբերի 1-ի առավոտյան երկրի տարբեր շրջաններում խոցվել է ուկրաինական 235 անօդաչու սարք։
Ուկրաինան հարվածել է նաեւ հրթիռային վառելիք արտադրող ռուսական գործարանին
Ուկրաինայի զինված ուժերի գլխավոր շտաբը հոկտեմբերի 31-ին հայտնել է, որ ուկրաինական ուժերը հարվածել են Ռուսաստանի Ռոստովի մարզի Կամենսկ-Շախտինսկի քաղաքի «Կամենսկի» գործարանին։
Ուկրաինական կողմի հաղորդմամբ՝ հարվածի հետեւանքով հրդեհ է բռնկվել պատրաստի արտադրանքի պահեստում, վնասվել են պինդ հրթիռային վառելիք արտադրող չորս արտադրամաս։
Գործարանը արտադրում է պինդ հրթիռային վառելիք, որն օգտագործվում է, մասնավորապես, «Ուրագան», «Սմերչ» եւ «Տոռնադո-Ս» համազարկային կրակի ռեակտիվ համակարգերում։
Զելենսկին եւ Էրդողանը Ստամբուլում քննարկել են բանակցությունները եւ Սեւ ծովի անվտանգությունը
Հոկտեմբերի 31-ին Ստամբուլում հանդիպել են Ուկրաինայի նախագահ Վոլոդիմիր Զելենսկին եւ Թուրքիայի նախագահ Ռեջեփ Թայիփ Էրդողանը։
Հանդիպման ընթացքում քննարկվել են ռուս-ուկրաինական բանակցությունների հնարավոր շարունակությունը, Թուրքիայի մասնակցությունը կարգավորման գործընթացին եւ Սեւ ծովում նավագնացության անվտանգությունը։
Զելենսկին հայտնել է, որ կողմերն անդրադարձել են Սեւ ծովով հացահատիկի արտահանման միջանցքի գործունեության ապահովմանը։ Էրդողանը հայտարարել է, որ քաղաքացիական նավերի վրա հարձակումներն անընդունելի են։
Հանդիպման համատեքստում քննարկվել է նաեւ Ռուսաստանի, Ուկրաինայի եւ ԱՄՆ-ի մասնակցությամբ եռակողմ բանակցությունների հնարավորությունը։
