Ոստիկանության եւ «Տրանս-Սֆեր» ընկերությունների միջեւ թեժ պայքար է գնում «ԱրմենՏելի» գրասենյակների պահակակետերի պահնորդական ծառայությունն իրականացնելու համար:
«Տրանս-Սֆեր» ընկերության ղեկավար Հովհաննես Պետրոսյանը պնդում է՝ ՀՀ ոստիկանության պետական պահպանության գլխավոր վարչությունը (ՊՊԳՎ) ապօրինի քայլերի է դիմում: Այս մասին այսօր Պետրոսյանը ներկայացրեց «Տեսակետ» ակումբում:
Պետրոսյանի պատմելով՝ «Տրանս-Սֆեր» ընկերությունը մասնակցել է «ԱրմենՏելի» հայտարարած մրցույթին եւ այս տարվա փետրվարին հաղթող է ճանաչվել մրցույթում՝ «ԱրմենՏելի» օբյեկտներում պահպանություն իրականացնելու համար: Ապա, ինչպես պատմեց Պետրոսյանը, «ԱրմենՏելը» ընկերությանը դիմել է, որպեսզի ապրիլի 1-ից «Տրանս-Սֆերն» ընդունի «ԱրմենՏելի» օբյեկտների պահնորդական ծառայությունը, մինչեւ պայմանագիրը կկնքվի: Ընկերությունը այս տարվա մարտի 1-ից 4-ն ընկած ժամանակահատվածում Հայաստանի տարածքում գտնվող «ԱրմենՏելի» 47 օբյեկտների պահպանությունը հանձնման-ընդունման ակտերով ընդունել է:
«Ոստիկանության ՊՊԳՎ-ն 06.04.2016թ–ին «Տրանս-Սֆեր» ՍՊԸ-ի նկատմամբ ձեռք է բերել հարկային գաղտնիք կազմող տեղեկատվություն, եւ իր շահերից ելնելով, օգտագործել է, որպեսզի ընկերությունը որակազրկվի եւ իր հետ կնքվի համապատասխան պայմանագիրը»,-ասաց ընկերության ղեկավար Հովհաննես Պետրոսյանը: Նրա ներկայացմամբ՝ ոստիկանությունն «ԱրմենՏելին» գաղտնի՝ հարկային տեղեկատվություն է տրամադրել, որ «Տրանս-Սֆեր» ընկերությունում 100 պահնորդներ մրցույթին մասնակցելու պահին չեն եղել. Սա, ըստ Պետրոսյանի, ապօրինի քայլ է ոստիկանության կողմից: Բացի այս, Պետրոսյանը պնդեց, որ մրցույթում մասնակցելու պահին նման պահանջ չի եղել «ԱրմենՏելի» կողմից, այս ընկերության ներկայացուցիչները վստահեցրել են, որ 100 պահնորդի առկայությունը պարտադիր է պայմանագիրը կնքելու պահին:
Կարդացեք նաև
Պետրոսյանի վստահեցմամբ՝ ոստիկանությունը փորձում է անօրինական կարգով, իր լիազորությունները չարաշահելով պահնորդական ծառայություն մատուցման շուկայից դուրս մղել մասնավոր ընկերությանը եւ այն մենաշնորհել:
Մանրամասները՝ տեսանյութում
Ըստ ընկերության ղեկավարի՝ ոստիկանության ՊՊԳՎ վարչությունն իրավունք չունի նման մրցույթների մասնակցել, քանի որ ըստ օրենքի, գնումներին մասնակցելու համար հայտ ներկայացնող ընկերությունը պետք է ներկայացնի գնային առաջարկ եւ շահույթ, իսկ ոստիկանություն ՊՊԳՎ-ն շահույթ չհետապնդող սուբյեկտ է:
«Տրանս-Սֆեր» ընկերության ղեկավարն ասաց, որ խնդրի լուծման համար դիմել են դատարան՝ պարտադրել «ԱրմենՏելին» կնքել պայմանագիր «Տրանս-Սֆերի» հետ՝ պահնորդական ծառայություն մատուցելու: Դատարանի վճիռ դեռ չկա, սակայն կա դատարանի որոշում, ըստ որի դատարանն արգելում է «ԱրմենՏելին» պարտադրել «Տրանս-Սֆերին» դադարեցնել գրասենյակներում պահնորդական ծառայությունների իրականացումն ու հանձնման ընդունման ակտերի կատարումը:
Գործի առնչությամբ ընկերության փաստաբան Վարուժան Փաշայանի կողմից ներկայացվող մանրամասները՝ տեսանյութում
Մանրամասն՝ տեսանյութում
Սակայն, ուշագրավ է, որ դատարանի այս որոշումն արհամարհում են եւ «ԱրմենՏելը» եւ ոստիկանությունը:
Պետրոսյանի պատմելով՝ «ԱրմենՏելը»-ը օրերս գրավոր պարտադրել է «Տրանս-Սֆերին» դադարեցնել «ԱրմենՏելի» օբյեկտներում պահնորդական ծառայությունը եւ այն հանձնել ոստիկանության ՊՊԳՎ-ին:
«Մենք մեր աշխատակիցներին հրահանգել ենք չլքել պահակակետերը, քանի որ այդ մասին ունենք դատարանի որոշում»,-ասաց Պետրոսյանը:
Հենց ասուլիսի ժամանակ Հովհաննես Պետրոսյանին զանգահարեցին իր ընկերության ներկայացուցիչները եւ պատմեցին, որ Ալավերդու եւ Գորիսի ոստիկանությունից նրանց սպառնում են լքել պահակակետերը, հակառակ դեպքում «Տրանս-Սֆերի»՝ պահնորդական ծառայություն իրականացնողներին կտանեն բաժին:
Ոստիկանության աշխատակիցների սպառնալիքների ձայնագրության մանրամասները՝ տեսանյութերում՝
Խնդրի առնչությամբ Aravot.am-ը գրավոր հարցում է ուղարկել եւ «ԱրմենՏելին» եւ ՀՀ ոստիկանությանը, որոնց պարզաբանումները կներկայացնենք առաջիկայում:
Նելլի ԲԱԲԱՅԱՆ
