2016թ. հունիսի 28-ի երեկոյան Ստամբուլի Աթաթյուրքի անվան միջազգային օդանավակայանում տեղի ունեցած ահաբեկչական գործողություններին է անդրադարձել այդ երկրի նախագահ Ռեջեփ Թայիփ Էրդողանը։ Այդ մասին տեղեկացնում է «Ջիհան» լրատվական գործակալությունը։
Էրդողանն իր խոսքում խստորեն դատապարտել է Աթաթյուրքի անվան օդանավակայանում տեղի ունեցած ահաբեկչական գործողությունները և ասել, որ դրանց նպատակը Թուրքիայի հանդեպ հակաքարոզչություն իրականացնելն էր, որի հետևանքով զոհվեցին անմեղ մարդիկ։
Թուրքիայի նախագահն ասել է նաև, որ տեղի ունեցածից հետո Թուրքիան Արևմուտքից վճռական դիրքորոշում է սպասում՝ ահաբեկչության դեմ համընդհանուր պայքարի գործում։
Նրա խոսքերով. «Այսօր Ստամբուլում պայթած պայթուցիկները, ահաբեկչության դավաճանական բնույթի հետևանքով, կարող էին պայթել ցանկացած քաղաքում, ցանկացած օդանավակայանում։ Բոլորը թող վստահ լինեն, որ ահաբեկչական խմբավորումների համար Ստամբուլի և Լոնդոնի, Անկարայի և Բեռլինի, Իզմիրի և Չիկագոյի կամ Անթալիայի և Հռոմի միջև տարբերություն չկա»։
Կարդացեք նաև
Աղբյուրի փոխանցմամբ՝ օդանավակայանի պայթյունների լուրը ստանալուց հետո նախագահ Էրդողանը խորհրդակցության է հրավիրել Թուրքիայի ԶՈւ ԳՇ պետ Հուլուսի Աքարին և վարչապետ Բինալի Յըլդըրըմին։
Տեղեկացնենք նաև, որ վարչապետ Յըլդըրըմն արդեն իսկ հայտարարել է, որ ահաբեկչությունը կազմակերպելու վերաբերյալ ստացված բոլոր փաստերը վկայում են, որ դրա հետևում կանգնած է «Իսլամական պետություն» ահաբեկչական խմբավորումը։
