Էրեբունի եւ Նուբարաշեն վարչական շրջանների ընդհանուր իրավասության առաջին ատյանում դատավոր Վլադիմիր Գրիգորյանի նախագահությամբ շարունակվում էր «Օֆշորի գործի» քննությունը:
Դատական նիստի ընթացքում պետք է հարցաքննվեին գործով վկաներ «ԱրմՍվիս» բանկի հաշվապահ Իննա Սուքիասյանը եւ բանկի գործադիր տնօրեն Գեւորգ Մաչանյանը: Վլադիմիր Գրիգորյանը հայտարարեց, որ «Ամերիա» բանկից գրություն է ստացել, որ ընտանեկան հանգամանքներով պայմանավորված «Ամերիա» բանկի նախագահ Արտակ Հանեսյանը չի կարող մասնակցել նիստին:
Դատավորը նկատեց, որ նախորդ դատական նիստին «Ամերիա» բանկի ներկայացուցիչ, գործով վկա Գագիկ Սահակյանը դատարանին խոստացել էր համապատասխան գրություն եւ փաստաթղթեր ուղարկել դատարանին, սակայն դատարանը մինչ այժմ որեւէ գրություն չի ստացել նրանից:
Կարդացեք նաև
Դատարանը մեկ այլ գրություն է ստացել «ԱրմՍվիս» բանկից, որով տեղեկացնում են, որ Գեւորգ Մաչանյանը գտնվում է իր հերթական արձակուրդում, եւ հետեւաբար չի կարող մասնակցել դատական նիստին: Դատարանը հարգելի համարեց նրա բացակայությունը: Վլադիմիր Գրիգորյանը հայտարարեց, որ դատարանը Իննա Սուքիասյանի բացակայության մասին որեւէ տեղեկություն չունի, սակայն նաեւ որեւէ հավաստագիր չունի այն մասին, որ վկան պատշաճ իրազեկված է եղել, սակայն չի ներկայացել դատարան: Դատարանը որոշեց վկաներին եւս մեկ անգամ ծանուցել:
Դատական նիստը հետաձգվեց, հաջորդ նիստը տեղի կունենա հուլիսի 21-ին:
Ամի ՉԻՉԱԿՅԱՆ
